Les desferenzies de temperatura fej jì cialà l crep sen d'aisciuda
Ala restarà scluta enfin a la fin de auril - I laours jirà endere empò inant
I tecnics provinziai y i raprejentanc dla firma che comeda la streda nueva dla Val Badia à valuté enier deberieda la situazion de segureza. De gran dificoltés vegn atualmenter gaujedes da les condizions dl temp. N clap de encer 20 esperc é tl analisé la crepadura do streda ite. Entratant les festes de Pasca restarà la streda perchel sareda, bonamenter enfin ai 24 de auril. I laours ne vegn endere nia sospenus. Foto: ruvijes met tres endò en pericul streda y transiament.
Bele dant da does edemes fòvel bele vegnù ju na gran ruvisc (smueia) avisa dant l terz tunel, metan en pericul ence i laoranc: la streda ova atira messù vegnì scluta sun na tela. Aladò dl arat di geologs gaujeia la conformazion dl crep scherpent adum a les gran desferenzies de temperatura via per l dì y la nuet, anter glacé y desglacé, na tel forza che fej jì cialà te deplù posc' la crepadura. An se à entenù che i rogns smueia inant, ence olàche al é bele gnù ju pedrigna, y perchel jiràl debujegn cotant de majeri laours de segurament desche an minova denant. Da en venders, ai 9 de auril 2004, vegniràl fat jì cialà i pedrons plu periculousc y les rives vegnirà curides con reis de stravert. Condut l pericul dess i laours pro la streda empò jí inant enfin al secont tunel.
