benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La relazion de Bepe Detomas
scrit ai 06 April 2004 da les 17:00:38 da noeles

Politica

 

I fascians é i unics ladins a d'avei na raprejentanza politica autonoma

Depierpul ésen tla provinzia de Bulsan jus endaour - "L Staut de Autonomia é agaié pro ai bujegns di Todesc y Talians, i Ladins conta ben puech tla provinzia de Bulsan" dij l on. Bepe Detomas - Ejempl: TAR

La relazion de Bepe Detomas al Convegn de Bulsan é steda plena de referimenc storics, n viade tres les normes giuridiches revardentes la mendranza ladina de Bulsan y de Trent: la sconanza di Ladins tres l Statut de autonomia dal 1948 inant. Chest Statut, frut dl tratat de Paris 1946, che ne reconesc nia i ladins, á porvé de fé avalei per i ladins valch un di criters internazionai dl tratat. Valch cossa é garateda per Ia provinzia de Bulsan, ma nia per Trent. L'art. 87 dl Statut 48 dij: "É garantito l'insegnamento del ladino nelle scuole elementari delle località ove esso è parlato. Le province e i comuni devono altresi rispettare Ia toponomastica, la cultura e le tradizioni". Enceben che al sie scrit "Province" (plural) ne suzédel nia a Trent. "L'ordinanza del ministero della P.I." met su bele dI 1948 "la scuola ladina paritetica" per les vals de Badia y de Gherdeina. Nia a Trent, condut che a livel de sconanza costituzionala fova l Statut l medem per trames les provinzies. Foto: l raion ladin partì sun does Regions y trei provinzies, piec ne podéssel nia ester. Vigni valeda va do sie troi. Demé la Union Generela ciala de tegnì en pé na unité.



Ma Ia maioura desferenziazion sauta fora tres l secont Statut de Autonomia dl 1972 che stramuda sostanzialmenter l cheder giuridich costituzional per i Iadins dles does provinzies. Con la sourandeda dles competenzes legislatives a les provinzies autonomes vel la chestion dla sconanza dles mendranzes linguistiches demé plu per Bulsan. Ai ciafa l'Intendenza y l dert de raprejentanza politica a livel provinzial y regional. Generala, tourbla y con nia de fosch sun blanch, tut fora l respet per la toponomastica (art.102), Ia sconanza di ladins tla provinzia de Trent. Chesta desferenziazion cherieia n puech alaouta la reazion: vueia de gnì con Balsan, de mudé l Statut, de cumpeida dla jent.
L miorament dla situazion per i ladins de Trent é spo pieda via da la iniziativa popolara de tarmené l teritore de Fascia y con Ia creazion dl Comprensore. TI art. 4 dl D.P.R.'76 vegnivel ciamò dit che "Il ladino è lingua di italianizzazione" y enscì déssel daidé pro a emparé damiec l talian. Avisa l contrar de chela che dova ester sia dreta funzion: fé emparé l ladin. Les istituzions y la politica ladina de Fascia à abù tl Comprensore sie pont de referiment y de desvilup. Les cosses concretes met man da madorì dal 1988 inant: l ensegnament dl ladin ruva ite tla scola elementara, te dutes les scoles dl oblich pòn fé cultura ladina. An met spo ence man de rejoné de cumpeida dla jent. Tl 1997 la nominazion bilinga ofiziala di comuns de Fascia. Tres la lege costituzionala dl 31 de jené 2001 se sclùjel ju la vedla storia dles desvalivanzes anter i ladins de Trent y de Bulsan, orida con l statut dl 1972. Al vegn l reconesciment dla raprejentanza politica tl Consei provinzial y regional, l certl lital y d'autres rejons. A Bulsan laòren entratant per mioré l
 vive adum anter i doi grups etnics: chel todesch y chel talian. I ladins vegn de chest vers conscidrés da na pert todesch y da l'autra talians. Desche mendranza per sè enstessa ne ései mai vegnus vedus. Dutaorela ne végnei nia conscidrés desvalifs da todesc y talians. Les scincundes ciafedes ne i fej nia plu stersc y autonoms. La Comiscion Tributara, l Tribunal Aministratif (TAR) ne fova nia vegnus pensés per i ladins, ma per i todesc y i talians. Tla provinzia de Bulsan conta giuridicamenter i ladins ben puech. Te chest vers laora la Generela dut autramenter, ala proa de sconé duc i comuns ladins, ence chi storics da Souramont y ala se meritassa propi de vegnì reconesciuda desche raprejentanta de duc i comuns. A Belun él suzedù che Ia Provinzia enstessa à porté i comuns a se declaré ladins, bonamenter per fins economics, crian enscì n fenomen rie da manajê. Lascian da na pert privilegs y divijions fòssel veramenter gran ora de pensé a n "corp de normes" valives per duc i ladins che à coscienza de ester ladins. La lege 482/99 nes fej da fondamenta y nes dà ence dant les massaries. Al ne é dessegur nia ciamò massa adora da rejoné de comunité ladina, ma na comunité mess avei n sie lingaz ofizial, altamo scrit: chel standard elaboré dai istituc culturai y da la Generela. Mioramec é samben tres benvedus, altamo dàn a chesta moda l'imprescion a talians y todesc de ester unis. N aiut ai ladins pò dutaorela ester Ia Region, sce l'assessour ladin s'entopa de fé sie laour tla dreta direzion. N auter gran vare inant fossa sen chel de se prejenté desche grup etnich ladin dolomitan dant a l'Europa. Unis desche grup dolomitich y clocoré deberieda ai Ofizes dl'Europa. La forza vegn dal ester unis, da se mueve deberieda. La forza deida auzé la coscienza y la vueia de laoré tres y plu deberieda. (uc)


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.426 seconc