Pult: "Cie che é pice mess ester plu bel!"

N marketing finalisé al lingaz dess ester per les assoziazions dl turism n dovei primar

Dla relazion tegnida da Chasper Pult pro l Convegn da Bulsan fòssel cotant de cosses da auzé fora, ma i provon de dé l'idea, de vedei ite l pensier che deida Pult a ester tres tant interessant y entusiasmé dl mond rumanc. Pult à reconesciù publicamenter a Bulsan che el é n europeist, un de chi che volessa la Svizra tla UE. Chest deida capì sie gran engajament per fé utilisé l rumanc tl marketing. La comunité rumancia é picera ti confronc dles autres trei comunités svizres. Cie che é pice mess ester bel per ester bon de se fé cialé: sce i autri mostra sun n pom, mess l pice altamo mostré n bel per fé gola.

Sce i autri scriv "bonté" dess l rumanc mete na "steila", valch che slumine per crié atenzion. Ajache Pult crei tla comunanza rumancia vuelel samben che ala se prejenteie unida y capazia, segura d'ester majera y competenta. Per realisé chesta unité y chesta forza tl vers dla Europa entiera veid Pult l lingaz unitar "Rumantsch Grischun" desche massaria prinzipala. I sciors, i forestiers mess podei conesce la realté rumancia dla Svizra, vegnì a contat con ela.

I turisc' che vegn tla Svizra n'à nia i problems reai da vigni di  y perchel mess ti dé l marketing rumanc messajes che desceida la curiosité, les novités culturales, orazions de reflescion tres l spetacul dla natura. La bravura vegn da la fantasia de prejentazion, da la convinzion d'avei valch danuef da dì y da comuniché tegnan cont che l lingaz rumanc ne va mai conscidré de secont orden envers ai autri lingac, ma tres tl orden d'ester n lingaz extra, unich y plen de inovazions. Sce al vegn scrit valch te deplù lingac, spo ne mess l rumanc mai ester na scempla traduzion, maben ester valch de original, n messaje che tol ite la vita dla localité, che deura n viere sun l mond dla comunanza rumancia. I placac che à abù plu suzes é stés propi chi che à respeté la dimenjion rumancia, chi che, dlongia la descrizion dla cualité dl produt, met ence a lum l liam dl produt con la realté rumancia. N marketing elaboré y finalisé a la publizité dla comunanza rumancia dess ester per les aziendes de turism n dovei   prirnar. Desche i titui di foliec deida pro a fé lieje l foliet, enscì ence n marketing rumanc fantasious y programé fajarà conesce la Rumancia y tirarà adalerch turisć y clienc per si produc. Na cossa dess ester clera: che an ne dess nia se daudé de nost lingaz, ma fé de dut per l lascé vedei y l mostré su. (ip)