benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N terz Istitut Cultural Ladin
scrit ai 23 December 2002 da les 09:53:46 da noeles

Cultura

 

 

Al dess ciapé alberch tla "Cesa de Jan" a Col Santa Lizia - L comun de Col piarà via con i laours

 

de Lorenzo Soratroi

 

Al é vegnù descorù souradut dl Istitut Cultural Ladin per i trei Comuns, che essa da vegnì fat via Col tla "Cesa de Jan" tla reunion dla Consulta di Comuns ladins “storics”, che é vegnuda tegnuda a Col en la edema passeda. La bona nueva che i finanziamenc prevedus da la lege cheder nazionala sun les mendranzes, la 482/99, fossa da veira do a rové, à fat speré les aministrazions y les Unions di Ladins di trei comuns de Col, Ampez y Fodom.



Dutes trei deberieda ova defat prejenté l projet per n Istitut Cultural Ladin che servesc a la realté ugnola di ladins del Sela sot a Belum.
N debujegn gran y sentù da plu pertes per desfarenzié la realté de chestes trei comunités che da tres se declareia ladines y che à na storia duta desvaliva dal rest dla provinzia de Belum, dret lieda ai Ladins dl Adesc Aut. Per scomencé con l'ativité de chest Istitut Cultural él vegnù conzedù n finanziament de 63 mile euro, en basa a n projet de scomenciadives metù ju da la Consulta. A jì dantfora con l projet dl Istitut sarà l Comun da Col. Emprumadedut messaràn comedé fora la vedla "Cesa de Jan" y spo nominé n Comité Scientifich che porte inant les ativités dl Istitut che essa da ester les medemes de cheles portedes inant dai Istituc de Fascia y de Badia.
N auter Istitut essa da vegnì fat a Borca de Ciadoura per l rest di comuns che s’à declaré ladins tla Provinzia de Belum y che arà sciche referiment l’Aministrazion Provinziala.
Defat, con chisc finanziamenc, l Stat Talian à reconesciù che tla Provinzia de Belum ejìstel does realtés ladines clermenter despartides, con na storia autramenter, de autres raijes, de autri liams. En puech co chel che al à dit ( o messù dì ) l Consei Provinzial, canche al é vegnù fat la perimetrazion di Comuns Ladins, demé che al é vegnù tres cialé de scone via y fè desmentié ciuldiche massa pericolous, massa decontra a na politica che mira a ben dut d'auter.

Con la senteda dla fin de ann, la Presidenza dla Consulta vegnirà passeda de man. Do dodesc meisc de gestion da pert de Col con l President dl’Union, Paola Agostini, ti tocaràl sen a Siro Bigontina de Ampez, de “mené la cadria” di "Ladins storics" do na souc che feje regoie plu che an po. Tla senteda dla Consulta él vegnù rejoné ence de gestion dla mont y dl laour da bacan da messei sostignì. De bones nueves ence per l repetidour nuef dla televijion sul jouf de Giau. Do che la Souraentendenza de Aunejia ova refusé n prum projet, someiel ades che la seconda soluzion porteda ti ufizes soura la laguna, ae abù l benester. Forsc podaràn enscì tost envié via i laours per l repetidour nuef che servesc i trei Comuns per ciapé les trasmiscions dla RAI 3 Ladina da Bulsan.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.375 seconc