La pagjine e conte i fats plui significants dal Grison a la Furlanie

Articul sourantout da http://www.ladinsdalfriul.org/ - edizion de auril dl mensil Ladins dal Friul

Tal mês di fevrâr di zà fa vincjecinc agns, sore il dut par mert di Berto Videsott, e nasseve e si meteve adun l'Union Scritours Ladins "Agacins", ative in principalitât tal cjamp des colaborazions zornalistichis cun articui publicâts, in lenghe ladine sui zonâi dal Sud Tirôl "L'Alto Adige" (di lenghe italiane) e "Dolomiten" (di lenghe todescje). Cheste colaborazion e cuistarà continuitât e concretece sore il dut su "L'Alto Adige" cu la publicazion setemanâl di une "Plata Ladina" (Pagjine Ladine).

I articui a frontin plusôrs aspiets , ossei croniche, culture, custum e ancje pulitiche, almancul dulà che cheste e lave a interessâ i fats e i problems dai ladins e de ladinitât. Un mert particulâr Berto Videsott e la sô "Plata" lu cuistin pa l'impegn davuelt sul cont dai rapuarts interladins. La pagjine e conte i fats plui significants che si stan davuelgìnt sevi tal Grison (Ladinie Svuizare) sevi in Furlanie (Ladinie di Jevât). Oltri a chest a vegnin publicâts ancje articui in lenghe furlane di Bruno Muzzatti e Tarcisio Barbin (doi furlans ch'a lòghin di agns in cà tal capolûc dal Sud Tirôl) e inmò di Agnul M. Pitane e Renzo Balzan.

L'Union Scritours Ladins "Agacins", ch'e cjape dentri scritôrs ladins di dutis lis valadis ladinis dolomitanis, par chest 2004  e intint lâ dilunc a informâ i Ladins des Dolomitis su ce ch'al sucêt tal Grison e in Furlanie cul fin di mantignî i contats leteraris e zornalistics e d'art par vê un confront  e ancje par infuartî i rapuarts di amistât. Chest naturalmentri al compuarte la presince a cunvignis e incuintris cu lis parelis unions dai scritôrs furlans e grisons. In cheste maniere s'intint garantît un sgambi costant di ideis e di propuestis tra lis tre realtâts ladinis.
Un lavôr e un impegn chest ch'al smire naturalmentri a prudelâ la cussience interladine e chê des Dolomitis. Chest al vignarà realizât in principalitât a traviers la pagjine ladine dal zornâl "L'Alto Adige" cun notiziis e contribûts di dutis lis valadis. In plui al è stât ativât il sît internet www.noeles.net dulà che i azornazents des notiziis a  vègnin fats dì par dì. Il sît al è curât di une redazion zornalistiche che, oltri a la croniche sui fats dal Sud Tirôl e la marimont, e ten davierts i dibatiments su lis principâls problematichis de minorance ladine. Ancje in chest câs a son curâts i rapuarts e i leams cui sît da l'informazion zornalistiche (in marilenghe) sul web dal Friûl e dal Grison. L'Union dai Scritours "Agacins" 'e da un grant pês al lengaç  ladin, aspiet principâl ch'al disferenzie la minorance e la manten leade 'es sôs radîs, e si bat parcè che la lenghe mari des ints ladinis e cjati il spazi e la considerazion che j spiete in dutis lis instituzions: tai ufizis publics, te scuele e in glesie.
Si domande inmò che l'informazion de lenghe ladine e vebi di cjatâ simpri plui spazi sui zornâi "L'Alto Adige" e "Dolomiten", di mût che i italians e i todescs dal Sud Tirôl a cuistin majôr cussience e cognossince de realtât ladine. Di cetant interès a son ancje i rapuarts di colaborazion tra i associâts da l'Union e la redazion zornalistiche de Radio e Television Ladine, ch'e à la sô sede alì de Rai di Bolsàn. E inmò cul sfuei  "la Usc di Ladins" (sfuei ufiziâl da l'Union Generala di Ladins dla Dolomites), ch'al à la sô redazion principâl a Urtijëi/St. Ulrich. In fin l'Union Scritours Ladins "Agacins" si sta tressant par inmaneâ cors di scriture sul cont dal ladin standard, purpûr rispietant e publicant ancje articui e contribûts des difarentis variants des vals. Oltri a chest e sta promovìnt la preparazion di tecnics di informatiche, di esperts di lenghistiche e di esperts di grafiche par rivâ a creâ , a traviers un grops di personis zovinis e preparadis,  un gnûf mût di scrivi e di fâ informazion par ladin. In sumis Berto Videsott  zà fa vincjecin agns nol à semenât par dibant, e daûr di lui e dal so lavôr disinteressât (sul plan economic) e passionât (sul plan ideâl) un biel grop di personis si son zontadis tal tignî vive e vivarôse la bandiere de Ladinie. A lui e ai siei colaboradôrs i augûrs  plui sclets de bande de redazion di "Ladins dal Friûl". La ladinitât e vîf di Cuere/Chur, 'es Dolomitis e insin in Furlanie!  (edelweiß)