benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Les ghiranzes dles Unions Culturales dla Val Badia
scrit ai 02 April 2004 da les 08:28:34 da noeles

Cultura

 

Les priorités: facolté de ladinistica, plu ores tl radio y tla tv, foliet ladin da vigni di  ......

Colocues con l assessour Mussner - Union di Ladins Val Badia y Union Maestri Ladins prejenteia sie catalogh de priorités - Mussner vuel na discuscion de basa sun la scola ladina

I raprejentanc dles unions culturales souracomunales de maioura emportanza dla Val Badia se à enconté en l’edema passeda con l assessour Florian Mussner. Les priorités culturales dess vegní conzentredes tl proscim temp sun na senta nueva per les unions souracomunales, deplù temp de trasmiscion tl radio y tla televijon ladina, la comiscion per la formazion di ensegnanc ladins, la senta destacheda dl Istitut Pedagogich Ladin tla Val Badia y la discuscion de basa sun la scola ladina. Foto: la Université de Bulsan, dutes les unions culturales se damana na catedra de ladin a l'université, la provinzia arfera.



Ai colocues con l assessour à tout pert i raprejentanc dla Union Maestri Ladins (UML) Otto Moling y Claudia Canins y i raprejentanc dla Union di Ladins Val Badia: Werner Pescosta (president) y Christian Ferdigg (aconsiadour) y Lois Trebo en raprejentanza dl EPL (Ert por i Ladins). Sun meisa él vegnù metù dant l laour cultural che an vuel dejouje ti proscims agns. 

I raprejentanc dles unions culturales se damana de: auzé les ores de ladin te scola dlonch a does ores a l´edema. Tles scoles profescionales dles valedes ladines déssel vegnì introdut n ensegnament paritetich desche tles autres scoles ladines. Adenjonta dess l Istitut Pedagogich Ladin (IPL) giaté na senta destacheda tla Val Badia. Te chesta gaujion él vegnù porté dant la idea de mete a desposizion informazions sun l grup de rejoneda ladina a les scoles todesces y talianes. I raprejentanc culturai vedessa ence de bon uedl, sce al vegnissa metù su n Istitut per Ladinistica tla Université de Bulsan y na comiscion per la formazion de ensegnanc ladins. Na autra aodanza é chela de aumenté l temp de trasmiscion pro radio y televijion ladina tres na redazion ladina autonoma. En plu déssel vegnì metù su na agenzia stampa ladina y na zaita ladina da vigni dì. Per les lies souracomunales él vegnù sotlinié l bujegn de na senta. I raprejentanc ne se à spo nia lascé tó la ocajion de damané n majer sustegn per l projet dl lingaz scrit unitar (SPELL). A revert les comiscions de maioura emportanza déssel ence ester raprejenté l grup de lingaz ladin. Per ti vegnì encontra al fenomen che an va a sté te d´autres valedes déssel vegnì enjigné de plu stieres publiches tles valedes ladines, enscí se damana i raprejentanc culturai che an damane ence l trilinguism per medesc (dotours) y apotecars tles valedes ladines. L assessour a responù a les domandes, dijan che ala se trata de mete priorités. De chest vers veidel de bon uedl la proposta de se enconté regolarmenter un n iade al ann con i raprejentanc dles unions culturales ladines per podei rejoné sun obietifs. Sies priorités: al moment la senta per les unions culturales, na majera lerch de trasmiscion ladina, la comiscion per la formazion di ensegnanc, la senta destacheda dl IPL tla Val Badia y la discuscion de basa sun la scola ladina.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.400 seconc