Tres deplù mutons con handicaps te scola
Chesta situazion se ghira sliazions nueves - I ensegnanc de sostegn vegn plan, plan desmetus
En venders, ai 26 de merz s’à abiné la comiscion per l’integrazion di mutons handicapés tla senta dla direzion raionala a San Linert per afronté con l assessour competent la situazion y i problems dl’integrazion tles scoles elementares y mesanes dl’Alta Val Badia. Dla comiscion féjel pert: Rubatscher Veronica, Vittur Daniela, Pitscheider Rita, Clara Elisabeth, Vittur Gabriella, Ferdigg Waltraud, Pizzinini Bruno, Hofer Sabine, Prucker Margit y Dapoz Verena. A l'enconteda à ence tout pert la aconsiadessa per l’integrazion te scola Sabine Hofer.
Da la discuscion él gnù a lum clermenter che i problems dla integrazion di mutons y dles mutans con handicaps o dificoltés tl emparé avaneia. La aconsiadessa psicopedagogica à sotrissé l’emportanza di tests tles competenzes che dess gnì valutés autramenter per la situazion linguistica particolara dles valedes ladines. L assessour Mussner à apriejé l’iniziativa dla direzion da ativé na tel comiscion per podei mete a discuscion y deslié i problems spezifics. I scolés con handicaps dess gnì desferenziés da chi con dificoltés da emparé per ti jì plu adencontra ai prums. I ensegnanc de classa mess se dé ju deplù con chi che se stenta y al ti dess eventualmenter ence gnì lascé dlaorela per madurì con la repetizion de n ann de scola. Al é ence gnù fora l’emportanza de na persona de referiment per i mutons che ne ruva nia do al ensegnament. L assessour à dit che tl davegnì ne saràl nia deplù meso de mete a desposizion ensegnanc de sostegn, davia che la normativa nazionala va tla direzion da ti mete permez demé plu ensegnanc a chi scolés che à diagnoses atestedes da na comiscion de dotours. Al é ence gnù metù sun meisa i problems di scolés che ruva te classes plu autes zenza savei endretura talian y todesch. Chilò se tràtela de chirì sliazions per ti ensegné miec i lingac. Aconsié él gnù de chirì soluzions ad hoc tles situazions concretes. L diretour Otto Moling à damané de giaté per l proscim ann de scola almanco l medem numer de ensegnanc de sostegn sciche en chest ann. L assessour à asseguré che al darà sie sostegn per ne lascé che l Ann Europeich dles persones con handicap ne reste nia parola vueta. (osp, ls/if)
