Noeles.net - Informazion ladina - Convegn a Bulsan: Les poscibeltés dl ladin

I erôrs di no fâ inte promozion de lenghe, mai jessi un alibi!

Articul sourantout da www.lenghe.net - Bepe Detomas: lis discriminazions a son cetantis - Bisugne svualâ adalt, fintremai a Bruxelles

I erôrs di no fâ inte promozion de lenghe minoritarie? "Mai dâ la idee di un alibi!", al à visât Chasper Pult, "par esempli no meti un titul par romanç a di un test dut par todesc: si cree la sensazion di debolece". Altre propueste: "No meti traduzions perfetis plurilengâls tes didascaliis di museus, une lenghe no à di tradusi chê altre, miôr dî la stesse robe in maniere dal dut divierse". E sui cartei stradâi no si scjampe: i caratars a àn di vê la stesse grandece par dutis lis lenghis dopradis.

Logo Tgi che sa rumantsch sa dapli

"Tgi che sa Rumantsch sa dapli" (Chi che sa rumanc sa deplù), enscí fej la televijion Rumancia reclam. Per promueve n lingaz vuelel ence ester na strategia de marketing da pert dles istituzions de dovei, enscí Chasper Pult.

A àn partecipât Chasper Pult, espert di marketing romanç-grison, William Cisilino in rapresentance de Provincie di Udin, il lenghist ladin Paul Videsott (che al studie e al insegne ladin te Universitât di Innsbruck, fat che nus samee pluitost insolit, stant che no son catedris in Ladinie e dome un insegnament intune facoltât a Bressanon), la professore universitarie Elisabeth Jankowski, il deputât ladin Beppe Detomas, e altris rapresentants de minorance ladine dolomitiche.
La lenghe ladine e à variants une vore marcadis par vie des divisions orografichis (lis monts jenfri lis valadis li che si fevele). Doprâ une lenghe-tet, un standard, al è necessari pe sorevivence dal ladin e pe sô stesse promozion. "Viodi i nestris problemis, lis nestris divisions di une prospetive relative al volarès dî superâju cence fâ fature", al à zontât Verra. Cuale ise cheste prospetive? L'Europe. E je daûr a nassi une gnove dimension pe minorance ladine, fint cumò strinzude jenfri lis grandis minorancis, chê italiane e chê todescje, che - al è stât dit di plui bandis te cunvigne - plui di cualchi volte e àn doprât la sûr minôr in mût strumentâl pai lôr interès. No si pues dineâ che i ladins a àn vût ancje beneficis di cheste situazion: al basti pensâ ae programazion par lenghe ladine mitude in onde da la Rai di Bolzan za di agns, un dirit che ai furlans al ven dineât insin tal dì di vuê.
Dut câs, la gnove prospetive europeane e varès di fâ vignî fûr inmò di plui chê che, cjalant ben, e reste la vere minorance lenghistiche autoctone che e à bisugne di jessi tutelade parcè che no à un Stât membri di riferiment: cumò, di fat, intal mosaic de Union Europee dulà che no son plui confins che si tocjin tra Italie e Gjermanie, i italians e i todescs altoatesins no rapresentin plui une grande particolaritât…ma i ladins sì! E te stesse suaze ancje i furlans in Friûl a restin la vere minorance cence Stât daûr.
Cunvint che i ladins a vedin di "jessi i prins a crodii", il deputât Detomas al à fevelât clâr e net di "discriminazions": "Parcè rapresentants de minorance ladine no puedin jentrâ te Comission tributarie, tal Tar?". Bisugne svualâ adalt, insumis, e cjalâ fintremai lis sagumis dai palaçs di Bruxelles.
Altri probleme su la taule de cunvigne di Bolzan: il câs dai ladins dal Venit e de corse ae autocertificazion di Comun ladin di bande di tancj ents locâi de Provincie di Belun. Une cuestion che i ladins "storics" - al samearès - a cjalin di stos. E di fat, cuant che une ladine-venete e propon di fâ incressi il spazi pe culture (gjavantint ae promozion de lenghe) intal ambit de leç statâl 482/99, plui di cualchidun al fâs une muse perplesse.
E cuant che William Cisilino al spieghe i grancj pas fats da la Provincie di Udin te promozion de marilenghe, i ladins no crodin aes lôs urelis: "Ma i furlans no jerino agnorums indaûr?", si domandin tra il public. O sin une minorance che e je daûr a madurâ, par furtune.

I erôrs di no fâ inte promozion de lenghe minoritarie? "Mai dâ la idee di un alibi!", al à visât Chasper Pult, "par esempli no meti un titul par romanç a di un test dut par todesc: si cree la sensazion di debolece". Altre propueste: "No meti traduzions perfetis plurilengâls tes didascaliis di museus, une lenghe no à di tradusi chê altre, miôr dî la stesse robe in maniere dal dut divierse". E sui cartei stradâi no si scjampe: i caratars a àn di vê la stesse grandece par dutis lis lenghis dopradis.
E pal insegnament a scuele? Par dî la veretât, si varès di tacâ te scune, secont la professore universitarie Jankowski: "La mari che no insegne la sô marilenghe al fì e je une mari a miezis, parcè che dome la marilenghe e je une esperienze sensoriâl che si trasmet, lis lenghis che a vegnin dopo si zontin, no puedin mai sostituîsi ae lenghe materne". Un intervent, chel de Jankowski, che al podarès meti in crisi di cussience schiriis di maris furlanis che intal fevelâ ai fîs si son dismenteadis di jessi furlanis, fasintjur pierdi un tesaur di emozions. Ce pecjât!


Vos ne seis nia loghé ite. [ Loghé ite ]