Ladin de Gherdeina, gramatica y ortografia
Ultims dis de iscrizion per cursc de ladin
L curs dl Ladin de Gherdeina per prinzipianc é de dodesc lezions y jirà inant dal 13 de auril enchin ai 21 de mei 2004 tla Scola d’Ert a Urtijei. Les encontedes vegn tegnides de mertesc y de vender da les ot a mesa les diesc da seira, dantaldut tl idiom de gherdeina. I argomenc dl curs é chi da vigni di, portés dant a na maniera da emparé les conescenzes fondamentales y la dreta pronunzia dla rejoneda a na moda che i partezipanc pò rejoné anter ei. Emplù vuelen arjonje che i partezipanc pò ence entene i media ladins, sciche l radio, la televijion y les zaites. L curs vegn tegnì da Erica Senoner. Interessés pò se lascé anoté su enchin ai 8 de auril 2004. Dal 24 de merz enchin l 26 de mei 2004 vegniràl tla biblioteca ”Oswald von Wolkenstein” de Selva tegnì n curs per chi che sà bele n puech da rejoné.
Les dodesc seires vegnirà tegnides de mertesc da les ot enchin a mesa les diesc da seira. Te chest curs végnel particolarmenter dé peis a la dreta pronunzia. Souraprò végnel fat pratica con les regoles de gramatica y de ortografia. Per chest curs, tegnì da Rosmarie Mussner, pòn ciamò se lascé anoté su enchin ai 22 de merz 2004. Informazions plu avisa giàten dal Servisc de Formazion dl Istitut Cultural Ladin „Micurà de Rü“, streda Nives 7 te Selva. I numeri de contat é tres telefon 0471 773225, fax 0471 794531 y e-mail furmazion.gh@ladinia.net .
