benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Istitut Ladin Majon di Fascegn: Danilo Dezulian president
scrit ai 16 March 2004 da les 16:52:23 da noeles

Cultura

 

Con Danilo Dezulian rùvel adalerch n sofl de spirit idealistich

Al ti à bele ortié n envit a duc 3 i assessours a la cultura dles provinzies per arjonje na lignora de normes valives

N om busient, souradut a livel cultural y politich, vegn endò cherdé a dé na man y bonamenter ence na sburla al Istitut cultural "La Majon di Fascegn". Ala se trata de Danilo Dezulian che è gnù metù da la Jonta provinziala de Trent president dl Consei de Istitut. Bele da les prumes intervistes che ti fova vegnudes fates do la nominazion àn podù audì sie spirit combatif, n puech plu prudent. Danilo à endò trat ca la vedla idea dla "Provinzia ladina", ma al ti à metù entournvia na cornisc culturala. A chesta moda ne rejònel nia plu de provinzia politica-ammistrativa, ma de chela culturala. Al conesc i juesc politics, i interesc economics dles provinzies, les minonghes di gherdeines y di badioc che ne fossa mai a una y perchel ne adòrel nia plu la parola "politica' y al se acontenteia de chela "culturala".



Ma Danilo crei dutaorela tla unité di Ladins y te chest vers réstel inant n pionier. Te chest moment de melsegureza y de pisima fòvel propi debujegn de n sofl idealistich, de na persona che à l coraje de rejoné de unité y de fé propostes concretes per ruvé a realisé valch da nuef. Al à bele porté dant trei propostes concretes per realisé la unité culturala interladina.

Atira naouta n envit a duc i assessours a la cultura dles trei provinzies: Bulsan, Trent y Belun de se abiné y de concordé na lignora de normes y de leges che posse avei valenza per duc i ladins entourn l Sela. Al vuel ester, dìjel, n regim de valivanza almanco olà che al é poscibel. Tl ciamp dla scola, dla cultura en general, dl trasport, dla sconanza dla natura, dl turism, dla imaja tres Internet y e.i.. per podei ruvé a na unité formala, a n sforz de unificazion. Degugn ne essa da perde, ma podessa avei n vantaje. Dessegur se tràtela de na volonté "politica", ma l'unité restassa a livel cultural. I vantajes economics restassa sun l post a na moda da tegnì fora l conflit d'interes. Al vuel ester che valgugn mane do, che un o l auter di assessours se tole la bria de ti sté do a la cossa. Al dess naouta vegnì rejoné y scrit persoura l'idea a na moda che ala vegne touta su y maneda inant. Al é bele n struf che al ne vegn nia plu rejoné. Gran ora da tré endò su l argoment y de l deslargé fora.

N'autra proposta de Dezulian é chela dé se dé ju dassen con l SPELL che dess garaté la forma primara de unité interladina. Emparé a scrive n lingaz soul fossa n gran vare inant y souradut n gran aiut al mantegniment di idioms che vegnissa a chesta moda integrés y miorés. Valgugn idioms à debujegn de na purgheda do ester stés massa die esponus. Ence l fascian deventa plu bel, plu autenticamenter ladin. Chest pò suzede a duc. Al n'é assolutamenter nia veir che l lingaz unifiché desdruje l idiom original, chest pò demé avei vantaje, vegnì zidlé, garaté plu elegant, ajache al pò conesce y anuzé paroles nueves, ma dessegur ladines. La chestion dl Spell deventa perchel n problem zentral, tamben per la salveza di idioms, ma ence y souradut per la unité di ladins, al fossa veramenter la merscia plu clera de nosta unité.

Terza proposta de Danilo é chela de crié na majera colaborazion con dutes les unions che laora tl ciamp cultural, ti dé fle per n majer impegn . Laoré deberieda é crié richeza y realisé deplù. Al moment àn l'imprescion che al sie a livel cultural plu fraidité co entusiasm. Poester pò n dialogh nuef con dutes les unions mioré la situazion. Na cossa che ti sta a cuer a Danilo é samben la colaborazion anter i Istituc Culturai, tout ite ence chel nuef de Col, che Danilo é a una de daidé. Chisc istituc dess samben colaboré tla elaborazion de n lingaz standard y tegnì tres dant i uedli la unité di ladins. Cie che ne vegn nia da la politica pò gnì dal elan cultural di trei istituc deberieda con dutes les unions y istituzions. (uc)


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.412 seconc