"Miec n patron folestier y n fant dl post!"
Dant les lites de gran empromiscions, do les lites degugn plu da spié
de Carlo Willeit
Tl program de govern dla provinzia vegnìvel auzé fora l debujegn de asseguré la raprejentanza ladina tles comiscions. Chest empegn é demé dret y corespon a un di ponc plu volus y batus da la lista LADINS. Sen che tl scomenciament dla legislatura él bele gnù renové nia pueces comiscions emportantes ciala fora la cossa n pue autramenter.
Tles comiscions de atuazion dla autonomia di Sies y paritetica per l personal statal ne él degun ladin; tles comiscions legislatives dla provinzia ne él degun ladin; tles comiscions legislatives dla region él Carlo Andreotti che se á declaré ladin sot a les protestes di fascians. A cef di organs y dles direzions de afars per todesc y ladins o per duc trei i grups ne él dessegur degun ladin. Al é cler che la prejenza ladina á na gran emportanza, demé sce i ladins a valch da fé valei. Sce ai ne á degugn interesc particolars (baudi mostra les ultimes lites te chesta direzion), spo él ence plu unfat sce n talian o n tudesch raprejenteia i ladins. Con n pue de malizia vàla ence da raidé la regula y dí: "Miec n patron folestier y n fant dl post"!
