Codejel nuef sun les poscibeltés de formazion do la mesana
Ultim termen per se scrive a les scoles autes, scoles pauriles y laours ciasans é l 31 de merz
(osp) Ai scolés dles scoles mesanes ti réstel demé plu pueces edemes per tò na dezijion sun sie davegnì scolastich. L Ofize Provinzial per la Formazion y Consulenza de laour spartesc fora tles scoles mesanes ladines y todesces n codejel nuef dal titul "Und so geht’s weiter! Aktuelle Ausbildungen nach der Mittelschule“ (samben demé per todesch, i ladins ne esisteia nia tla provinzia dles mendranzes, n.d.r.). Chest codejel dess ester n aiut per i scolés a tò sia dezijion.
La pruma plata dl codejel nuef sun les poscibeltés de formazion do la mesana.
Demé plu enfin ai 31 de merz pò i scolés dles scoles mesanes se scrive ite a na scola auta, na scola profescionala o na scola per l laour pauril, forestal o ciasan. Tl codejel nuef dl Ofize Provinzial per la Formazion y Consulenza de laour él da abiné dutes chestes scoles con na spliazion sun co che al é da fé la iscrizion y les poscibeltés de sostegn scolastich. En plu él ence da abiné la lista de ponc de informazion tla provinzia. L meso de informazion dess en valgunes edemes dant l ultim di per se scrive ite a d’autres scoles, dé n aiut de vela per i scolés y si genitours. L codejel é ence da giaté te dutes les sentes de Consulenza per l laour y pro l Ofize provinzial per la Formazion tla streda Andreas Hofer 18 a Bulsan (tel. 0471 413350). La miscion internet é: http://www.provinz.bz.it/Schulfuersorge-berufsberatung/
