"Mussner se fej propaganda litela cun la finanzes publiches"

Touta de posizion dla lista LADINS en cont dla invervista deda dal assessour Florian Mussner  encuei (19.12.2002)  al foliet "Dolomiten"

Le vizepresident dl Consei, Dr.Carlo Willeit (sul retrat)  á riesc tout posizion sun na intervista deda dal  assessour Mussner tamben encuei al foliet "Dolomiten", dijan che Florian Mussner  "fej propaganda politica cun la cumpetënzes, la finanzes y l aparat aministratif dla Provinzia y cun si detlarazion de biadum (tla zaita Dolomiten dl 19.12.02) desmostrel de vester  puech nëubl, y cieche l à dit n cont dla relazions cun Willeit y cun i LADINS ie n desfurmé dla realtà", dij Willeit. "I cuntac che Mussner dij de avëi cris fova fictifs, chëi che i LADINS y Willeit à cris, y chir mo for, ie reéi. Do che Mussner ie unì numinà assessëur ti à Willeit sëurandat persunalmënter na lista de argumënc y problems da se rujené ora deberieda; nchina sën ne n’àl giapà deguna resposta!", met en cler  Willeit.

"I LADINS ti à fat a Mussner y ala SVP la proposta de se ancunté mo dan l’ansciuda de chëst ann; la resposta ie stata negativa y l cumpurtamënt de Mussner fictif.

L’interogazions y la mozions ie n mesun per avëi na miëur ududa sun i lëures dla jonta provinziela y per garantì la raprejentanza direta di nteresc dla jënt, y nia manifestazions de simpatia o antipatia dl viers de vel’ assessëur. L’interpretazion de Mussner ie un di tentatifs per ne fé nia udëi si averscion al dialogh.

Mussner à mé da rujené cun la SVP, l ie per si grazia che ël ie unì numinà assessëur. Ël ne se rejona nia ora cun Willeit, davia che Willeit uel avisa chël che la SVP ne uel nia ti cunzeder ai ladins, i dërc che la jonta provinziela muessa ti dé ai zitadins",  scluj ju Willeit sia touta de posizion.