benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Cialan endò al 1978-1979
scrit ai 09 March 2004 da les 16:10:34 da noeles

Politica

 

"Chela flama mess endò vegnì empieda"

21 de fauré 1979 - 21 de fauré 2004: encuei màncel chel entusiasm che al fova enlaouta

de Umbert Cians

 
I on volù na outa lascé lerch ai autri, ma al é ence giust lascé audì nosta minonga soura i 25 agn dla "Plata". Da empruma "La Plata por i Ladins" y spo "Plata di Ladins". Les fadies, les veres per la tegnì en pé é stedes n grumon. Gonot àla mudé dì de comparizion: pieda via con l mercui, spo de lunesc, de juebia, per trueps agn de venders y te chisc ultims agn de mertesc. La gauja fova gonot tecnica.  21 de fauré 1979 - 21 de fauré 2004. Conscidran la cossa ann per ann, pérela longia, ma empò éla juda debota. Truep se à entratant mudé, valch él vegnù arjont, ma al mancia encuei souradut l entusiasm  di agn 1978-79, i agn dla fondazion dla Comunanza Ladina a Bulsan, cheles sentedes plenes de discuscion y de gran partezipazion.


Na seira fòvel plu de 30 persones con la "laurea" che fova dassen interessedes a mudé la situazion di ladins, spezialmenter di diplomés. I ladins ne podova nia tegní scola fora dles valedes, sce ai se declarova ladins, l proporz sclujova fora i ladins da cotant de postc publics. An é piés via con n gran spirit de volei realisé valch y i fruc é vegnus do: la Comunanza Ladina a Bulsan che á enjigné ca plan plan la jent a crié na Lista di Ladins tl comun de Bulsan y spo chela dl moviment politich. An se encontova gen y al vegniva souradut rejoné de cosses concretes, de problems, dla ciasa, dl laour, de n scagn, de na senta per la Comunanza-mendranza. Les discuscions ova spo ence atira n resson sun i foliec da vigni dí. Entratant l ann 1978 án podú lieje cotant de articui per talian: "Sulla strada dell´affermazione della Ladinia" (Carlo Willeit); "La situazione politico-amministrativa (Lois Craffonara); "La scuola per la conservazione della lingua" (Franz Perathoner); "La Comunanza Ladina a Bulsan per parlare anche delle valli" (Berto Videsott).
N problem che an sentiva souradut chilò a Bulsan fova la unité di ladins de dutes les valedes. An á ence podú lieje n lonch articul un l Alto Adige: "Ladini minoranza disunita". Propi per dé peis y emportanza a les sentedes y a les discuscions él vegnù pensé de crié na rubrica aposta sun n foliet. La verité é che an ova prové empruma pro l "Dolomiten", dan ju n articul per todesch. Anter empromiscions y baujies òven aspeté en valgunes edemes, damanan vignitant do a cie moda che l articul ne vegniva nia publiché. Ma nia da nen fé. L articul "Ladins, mendranza desconesciuda" vegniva spo metú ju per talian y porté a la redazion dl Alto Adige, al diretour da enlaouta Gianni Faustini. L dí do vegnível publiché. La lita dl foliet da anuzé fova perchel fata. Da empruma na lignora de articui per talian y spo é vegnuda l´autorisazion da mete man con n cianton resservé ai ladins che podova vegní scrit desche an volova: per ladin, talian y todesch. Al fova dret na bona colaborazion con la redazion dla plata di todesc sun l Alto Adige. Ben sies é stés entratant i diretours dl sfuei Alto Adige y pro vignun él sté valch picera mudazion o en ben o en mel. L sclaf plu gran é vegnù con l diretour Barbieri che à sclut la plata todescia y chela ladina tla edizion de Belun y al volova tó demez ence chela dla edizion de Trent. Con l diretour che ti é vegnù do, Giampaolo Visetti, él sté na senteda con i colaboradours dla Plata deberieda ence con Carlo Willeit. Frut dla discuscion: la plata vegn fora vigni mertesc y sun dutes trei les edizions dl foliet: Balsan, Trent y Belun. Mindicé scéchela ciamò, mo ala é dassen apriejeda. Tres plu sterscia se fej la ghiranza di neo-ladins da Belun per avei sia lerch. Al ti é vegnù garantì la lerch dal vedl diretour Visetti, davia che na delegazion fova juda da el. Souramont se fej audì tres deplù y ai veid souradut te chesta plata n mesum de comunicazion y de unificazion. Al é natural che la plata resta daverta ence a ei. La sburla per ruvé adum mess pa vegnì da ei y ai ne pò nience se aspeté n aiut da Bulsan.
La discuscion politica se à destudé, souradut do la tomeda dla Lista Ladins y la retrata de Carlo Williet. I argomenc da encuei é demé plu turism y sport. La jent é stancia y se cruzia dl souravive. Te na tel situazion él rie podei avei ideai per la defenura dla autonomia dla mendranza. L slogan da encuei: colaboré y scuté. Dan 25 agn jìvela pro autramenter. Chela flama va endò empieda!
 
 

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.374 seconc