benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La ladinité dl 2000
scrit ai 23 February 2004 da les 12:51:36 da noeles

Politica

 

"Olà sonse pa y olà jonse pa?"

É encuei la comunité ladina plu gaierda, segura y dinamica che enier?

de Erwin Valentini

Dant da 25 agn ovi abù la onour de daurì la “Plata ladins” dl Alto Adige con n articul “Ester ladin incö” (l articul dl 1979 podeise lieje te chest sit: http://www.noeles.net/modules.php?name=News&file=article&sid=595); te chel articul ovi prové de analisé les condizions sozioculturales dl ester ladin tla sozieté dl 2000. Te chisc ultims agn él suzedù truep y perchel me végnel vueia de cialé endò per capì cie che i on arjont y olà che i jon. La lista dles cosses fates é valgamia longia. Per s’en anadé bàstel ti cialé a les relazions de ativité dles istituzions y assoziazions culturales, a les infrastrutures culturales che é vegnudes metudes su tles valedes ladines y dantaldut a les nueves normatives che renforza l status politich di Ladins. I museums de Tor y de Vich y l istitut cultural de Col Santa Lizia reprejenteia n arichiment sostanzial y visibel dla contreda culturala ladina; les manifestazions y azions interladines sciche Ladiniatour, Euroschool y dantaldut SPELL pò vegnì vedudes sciche l’esprescion de n renforzament dla coscienza unitara dla comunité ladina.



Nostes valedes à podù conté sun i contribuc dla man publica locala, nazionala y europeica, ma les cosses arjontes é dantaldut l frut dles scomenciadives y dles bries de n valgugn idealisć: oms dla cultura, dl’informazion, dla politica. L suzes dla azion politica y culturala pò ence vegnì mesuré con l prestije che l ladin à arjont foradecà, pro nosc vejins y pro les autres mendranzes dl’Europa. L status di ladins dles Dolomites vegn vedù nia dinrer sciche n model da fé do, magari per rejons utilitaristiches, sciche i neoladins de Belun mostra.

Ma é dut or cie che lumina? Sce an ti ciala a la cualité plutost che a la cuantité di resultac veiden nia pueces ombries y cotant de desferenzies anter les valedes entourn l Sela. I ladins d’Ampez, Fodom y Col, do l contracolp dl pre-referendum a Fodom y dles ghiranzes di ladins de Bonora, à metù empé n istitut cultural comun, basa fondamentala per la realfabetisazion linguistica y sozioculturala de Fodom y Ampez. Propi con na politica de realfabetisazion ladina fòvel pié via dant da 25-30 agn l Istitut Cultural de Fascia che à chirì motivazion, ressurses y soluzions nia demé tla realté locala fasciana ma ence y dantaldut tl ideal plu ampl dla unité linguistica y culturala dla Ladinia. L suzes plu eclatant dla “renaissance” culturala y politica fasciana – les does cosses é dagnora liedes – é la capazité de se autoreprejenté politicamenter ti comuns, a Trent y a Roma.

Nia l medem ne pòn dì de Badia y Gherdeina; les valedes ladines de Sudtirol se stenta ciamò tres a colaboré con i “ladins de Souramont”, nia tant a livel dles assoziazions ma dessegur a livel dles istituzions. Nia dinrer àn l’imprescion che i badioc y gherdeines se dà plutost da fé, sot la bandiera dl lingaz dla oma y do l motto “small is beautiful” o “zuerst sind wir Tiroler”, a arferé ju y magari neutralisé chi che se bat per l’unité y per l’autonomia di Ladins. La lista fossa longia, chilò volonse demé sotrissé n valgugn fac conescius da duc:

 

- l decret contra l ladin standard dla jonta provinziala de Bulsan (aprové dantfora dal consei dl istitut ladin Micurà de Rü);

 

- la desdita dl contribut a l’Union Scritours Ladins – Agacins;

 

- la refusa de Bulsan de reconesce l’Union Generela di Ladins desche organisazion culturala souraprovinziala di Ladins (poscibelté preveduda da la lege nazionala 482/1999);

 

- y “last but not least” la dezijion litala di badioc y gherdeines de ti sourandé la reprejentanza de siei interesc politics a n partit forest, o sciche al vegn dit, a la Partei.

 

Ie é la imprescion che les organisazions istituzionales ladines da chesta pert di joufs - Istitut cultural Micurà de Rü, IPL, Intendenza, Museum de Tor - se sie burocratisedes dassen – i colaboradours é pu funzionars provinziai – y,  piec, che sies ativités sie en gran pert subordinedes a les ghiranzes dl “sistem” de Bulsan (na aministrazion ne é mai ideologicamenter neutrala y ciamò demanco na “governance” zentralistica y monolitica sciche chela de Sudtirol).

 

La lista dles cosses fates é, sciche i on dit, imprescionanta, ma é encuei la comunité ladina plu gaierda, dinamica y segura che enier? La maioura pert dles publicazions, manifestazions y infrastrutures ladines é scialdi demé liedes ai bujegns o interesc locai, con l efet che ales deida pro a renforzé la spezifizité y les desferenzies plutost che l’unité anter les valedes. La chestion fondamentala é y resta tres ciamò chela dla unité ladina y chilò onse finamai fat n vare zeruch. Nos vivon tl’era dla globalisazion, di confins daverc, ma chilò da nos despartesc i confins aministratifs tres deplù les valedes ladines ajache la vita soziala y culturala vegn regoleda da zentri che se cruzia dantaldut de consolidé sia autonomia o sie raion de ciacia. L mur cresc ite tres deplù ence tl cef y tl cuer dla jent che veid dut cant tres l filter de sia valeda y de sia provinzia. La volonté de colaborazion interladina é gonot demé na bela declarazion, dret “politically correct” ma vueta.

 

Donca dut per nia? La speranza é dagnora l’ultima a morì y nia dut é tant fosch. La politica culturala à encuei n gran defizit a livel dla promozion, dla reclamisazion dla ladinité sciche n valour - y no sciche n oget folcloristich o magari n peis - ence tla sozieté moderna, tl “global village”. L se scluje ite te sie pice mond meina a na folclorisazion y enultima ala desdruzion dla tradizion; al é interessant da osservé che trueps de chi che crei y se bat per la modernisazion y donca revalorisazion dla ladinité viv o à vivù fora dles valedes ladines. Na sburla pò vegnì da chesta pert.

 

La Comunanza ladina a Bulsan à metù su na organisazion olà che i ladins da vigni pert se enconta no sciche badioc o fodoms ma sciche ladins “tout court”; la Comunanza é steda ence la pruma organisazion che ti à davert la streda al ladin standard te na istituzion publica, tl consei dl comun de Bulsan.

 

La RAI y la Usc di Ladins sciche organs d’informazion souraregionai à fat truep per descedé su na coscienza panladina, ma ai podessa fé deplù y deventé l portaousc dles ghiranzes di Ladins.

 

La scomenciadiva plu bela de chisc ultims agn é vegnuda da la Union di scritours ladins, i Agacins, con la creazion dl sit d’informazion online www.noeles.net. La redazion de chest sit meina inant la azion informativa y promozionala dla “Plata ladins” te na forma moderna y te na viesta linguistica nueva, l ladin standard. Desche la Plata ladins nes pieta Noeles.net nia demé na paleta de minonghes desvalives y gonot critiches sun l mond ladin, dolomitan, grijon y furlan, ma ales meina fora ence n messaje cler de unité panladina: con l adoré l ladin standard métela concretamenter en pratica “Les undesc teses per na politica linguistica ladina” o “Manifest Ladinia 2005”.

 

L maiour merit de dut chest ti speta dantaldut al signour Berto Videsott: i ti auguron a el y a si colaboradours la forza de jì inant y i envion duc chi che pò a ti dé na man: al é n investiment per l davegnì di Ladins.

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.385 seconc