En sabeda él vegnù tegnù a batum l Istitut Ladin "Ciasa de Jan"
Al é bele da n struf pié via con i laours: cultura, toponomastica, scola - Entratant 142.000 euros tles casses
de Lorenzo Soratroi
En sabeda passeda él nasciù en forma ofiziala tal salf dl Consei de Comun de Col l nuef Istitut Cultural Ladin "Ciasa de Jan". I raprejentanc di comuns de Col, Fodom y Ampez y dles trei unions ladines, sozes fondadours dl Istitut, à firmé dant dal notar l statut enjigné te chisc meisc da na comiscion de esperc. Con l’ocajion él ence vegnù nominé l consei diretif de chel che al fajarà pert Paolo Frena, Capocomun de Col, Sandra Agostini, assesoura a la cultura dl comun de Col, Renato Dall'Acqua raprejentant dl’Union di Ladins de Col, Bruno Dimai vizecapocomun de Ampez, Siro Bigontina, president dl’Union di Ladins de Ampez, Paolo Delmonego, vizecapocomun de Fodom y Nani Pellegrini raprejentant dl’Union di Ladins de Fodom. "N gran event per i trei comuns" à dit Paolo Frena "segn de na gran vueia de jì inant con la valorisazion dla cultura y dl’identité ladina. Foto: i sozes fondadours dl Istitut Ladin "Ciasa de Jan".
"N patrimone de nosta jent" àl enjonté, "che tegn adum nosta jent per jì inant con raijes stersces tla storia y la cultura ladina, n patrimone da valorisé y che podarà porté ence n svilup." La senta dl nuef istitut é arlogheda tla vedla "Ciasa de Jan" de Col, ( da chilò ence l inom dl istitut), conesciuda ence desche "ciasa da les feriedes" per ester vegnuda zacan luech da olà che al vegniva aministré les mineores dl Fursil. L proscim vare sarà chel de mete en pé la comiscion culturala. En valgugn studiousc de cultura ladina é bele vegnus damanés y ai à dit de ester desponus. Anter chisc ence l glotologh prof. Vito Pallabazzer. Nani Pellegrini à volù ti sporje al nuef Istitut ence i augures dl’Union Generela. "Dutes les vals ladines dl Sela" àl dit " se augureia che l Istitut "Ciasa de Jan" envieie via n raport preferenzial con autri doi istituc de Fascia y de Badia, a na moda da podei deventé l terz pol cultural dla Ladinia storica dl Sela. Anter les rejonedes de gaujion él vegnù sotrissé ence desche l avei volù fé nasce l istitut di trei comuns via Col desmostre dapert de chestes trei comunités na gran vueia de sostegnì les mendres realtés, per crié svilup tres la colaborazion y la valorisazion culturala.
Da dezember encà laora te Istitut n joen da Col, Moreno Kerer che à da ti sté do a dut l laour de formazion dl istitut y a envié via i projec prevedus da la lege cheder nazionala 482/99 sun les mendranzes. En valgunes de chestes, desche l convegn de Reba sun l ensegnament dl ladin te scola é bele vegnudes enviedes via. D'autres, desche l mantegniment dla toponomastica ladina é bele tla fasa de realisazion y podarà jì inant dilan ai 141.000 euros de finanziamenc per l 2002, bele otegnus dal Istitut.
