benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Region Trentino-Sudtirol: la Jonta nueva
scrit ai 20 February 2004 da les 13:42:32 da noeles

Politica

 

Per i Ladins se deurel na sajon nueva tla Region

La clameda de Zanoner: inteligentsia ladina, inteletuai ladins, reprejentanc dl mond cultural, sozial, zivil y economich dla Ladinia fajedeves inant! Per ne arjumé nia via les ocajions

de Ricardo Zanoner

 

Enstadì, ai 18 de fauré 2004, él vegnù nominé la Jonta Regionala nueva. De chesta Jonta féjel pert doi raprejentanc dl grup linguistich talian, doi de chel todesch y un de chel ladin. La gran novité é che la presidenza é juda per l prum iade a n raprejentant dl grup linguistich todesch y plu avisa al Sourastant de Südtirol Luis Durnwalder. Chest é demé un di aspec plu significatifs, ajache chesta impostazion nueva mess vegnì encadreda desche na majera acordanza anter les does Provinzies, chela de Trent y chela de Bulsan, olache la Region deventarà na sort de laboratore politich de sperimentazion out a la colaborazion y a la cooperazion. Pervia de chest él gnù prevedù che l govern regional dess tò ite i doi presidenc dles Provinzies, doi Assessours, un dl grup linguistich talian y un dl grup linguistich todesch y n Assessour dl grup linguistich ladin. Foto: la despartizion fascista dla Ladinia dl 1923. La Region Trentino-Sudtirol à de chest vers n valour particolar per i Ladins. Deguna oredla tla provinzia da Bulsan per chesta problematica.



Al é ence vegnù dezidù de mudé ju amez legislatura enciaries: al sarà na muda anter i doi Presidenc y al vegnirà tamben mudé fora l assessour talian y l assessour ladin. Dut chest per daurì na sajon  nueva tla Region-Trentin Südtirol, na sajon che vegn do da temps storics, ence polemics, desche l “Los von Trient”, l “Pachet”, l secont Statut de autonomia, per ruvé enfin a encueicondì  a na Region zenza competenzes diretes, ma che mess prové a se dé na definizion nueva tl panorama politich local, nazional y europeich. La partida che i on dant da nos ti agn che vegn, con na Europa tres de plu deslargeda, mess ence avei n plan de chel che i son y de chel che i raprejenton, con se recordé che les does provinzies adum ne ruva nience a n n milion de persones.

Na Region donca che peia via con na impostazion de renovament: chela che met dantfora la colaborazion y la cooperazion anter les does provinzies y che tl medem temp vuel seghité a se caraterisé te si aspec particolars de raion da mont, olache al viv y conviv trei grups linguistics.

 

Ence l grup linguistich ladin donca é clamé a tò pert a chesta Jonta nueva y a porté ite  sie contribut desche realté de mendranza, con na competenza aposta per les chestions dles mendranzes. Na ocajion nueva, plena y rica de significat che vigni ladin dess sentì y vedei de utl per sie grup linguistich.

 

Al fova l 1905 canche a Dispruch nasciòvel, per endrez de n grup de inteletuai ladins, la pruma Union di Ladins con obietifs y programs outs al ben dla mendranza ladina. Encueicondì, en la veia di 100 agn da enlaouta, onse dant da nos zeche che ti someia truep, y laprò onse ence la ousc per porté inant nosc ideai y nostes proponetes a livel politich.

 

Al é  desche an essa n cheder vuet dant, zachei dij che chilò se tràtel de elaboré l terz Statut de Autonomia de nosta Region: da me enfora creii che desche ladins messonse prové, sce nia auter per n dovier moral, de dessegné te chest cheder l destin de nost popul de mendranza.

 

Per dut chest, me senti de dì:  inteligentsia ladina, inteletuai ladins, reprejentanc dl mond cultural, sozial, zivil y economich dla Ladinia fajedeves inant!


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.368 seconc