"... y che ala vive inant per d'autri 25 agn"
La plata é dagnora steda daverta a vignun, a vigni idea y proposta, a vigni critica giustificheda o nia y ne à mai tajenté nia ...
de Lois Trebo
Nia da creie che al sie bele passé 25 agn da canche la direzion dal Alto Adige ti à metù dant ai Ladins na plata aposta per ei, olà che ai podova scrive articui per ladin, talian o todesch sun si problems. La finamira per arjonje na tel plata fova una, giaté la poscibelté da ti rejoné ados ai talians y ai todesc de nosc problems y chest zenza polams sun la lenga. L foliet AA à sostegnì chest projet per trueps agn y trueps ladins à podù dì la sia sun les chestions ladines. Al desplej che la redazion dal AA ne conzed nia plu che i Ladins posse scrive sun sia plata articui per talian y per todesch desche naouta.
Al fossa dret emportant che i autri vegnissa alsavei, cie problems che i Ladins à y co che ai veid la situazion politica. L redadour de chesta plata siour Berto da Cians à fat laourons y fadies nia da dì per la tegnì en pé, messòvel pu chi agn tegnì en grum de ores de scola a Verona y furné su a Bulsan a mete ju la plata; spo i suzedòvel che al ti manciova valch articul y ben per miracul giatòvel dagnora zachei che i scrivova debota adum valch da emplì fora la plata, per n tel foliet é la continuité dut. Duc i sforc che al à fat da 25 agn encà, àl ofrì su per daidé comedé la situazion politica - culturala dai Ladins dles Dolomites che i é dagnora steda a cuer; per l miorament de chesta àl combatù y s'à batù zenza sconé sia sanité, sie cuer che batova gonot a pe zot dal blot laoré. La plata é dagnora steda daverta a vignun, a vigni idea y proposta, a vigni critica giustificheda o nia. Sie gran merit é ence chel da avei dagnora tout ite duc i Ladins dles Dolomites, ne sclujan fora deguna valeda. La finamira é steda: conduje adum i Ladins tres deplù che ai se sente na familia soula. Chest vare pò demé vegnì arjont, sce i Ladins empara a conesce tres miec si problems, chi dles autres valedes, sce ai vegn sensibilisés per capì la situazion dai autri Ladins. An pò dessegur dì che la plata ladina dal AA à daidé pro a lié adum i Ladins deplù, ence sce al romagn ciamò de gran grops da desfé y da tò demez, pregiudizes pesoc gonot zenza fonz. Ma sce al é la volenté di Ladins da volei se mantegnì ladins, se embastarài l am da arjonje chest travert. Al é demé da speré che la plata ladina dal AA vive inant d'autri 25 agn y che ala giate deplù scrivans anter tres deplù persones joenes che à a cuer l destin dai Ladins dles Dolomites.
