La Svp l'ova dlì che Mussner giatassa l assessorat
La Union Autonomista Ladina (Ual) à messù zede a la Svp, la pruma mesité de legislatura a Florian Mussner
Do plu ores de debates él vegnù lité enier da seira tert la Jonta Regionala. 39 di 59 conseiers prejenc ti à dé l sostegn a Durnwalder desche President dla Jonta Regionala, sie vize é Lorenzo Dellai, President dla provinzia de Trent che se mudarà ju amez legislatura. La Svp à ortié tla Jonta Martha Stocker, capora dles eles tla Svp y i Trentins Adelino Amistadi, chest ultim fej a rode con Luisa Gnecchi, assessoura taliana da Bulsan. Per cie che reverda l grup linguistich ladin à la Ual messù zede a la Svp y jí ite l compromis, desche al se ova bele delinié tles ultimes edemes: mesa la legislatura corirà Florian Mussner (Svp) la enciaria da assessour regional y l'autra mesa Luigi Chiocchetti (Ual). Plulere tourbel l davegnì dla istituzion region che vegn damprovia svuededa.
Encuei, 19.02.2004, vegniràl partí su les competenzes internes. A nia ne à joé dutes les argomentazions dla Ual che al ti vegnissa souralascé a Luigi Chiocchetti l assessorat, ajache Mussner é bele assessour provinzial y à enscí enciaries doples. Durnwalder ne à nia zedù, la Ual arata de podei convive empera.
