benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Erich Kastlunger: Mareo y Val Badia plura
scrit ai 15 February 2004 da les 22:23:51 da noeles

Persones

 

Erich dal Medo, pionier dal turism da d'invern, é mort

A la concuista de Plan de Corones: Dl 1967 àl fat su l implant Miara - Al ova condut da l'America ca l prum canon da la neif

(dc) Al à combatù agn alalongia contra n burt mel che l tichenova, gonot él sté bon da se tré su che an n’essa conesciù puech y nia, ma en chest iade àl messù ti la zede. Erich Kastlunger d’Al Plan, conesciù lonc y lerch desche Erich dal Medo (foto: sonan la chitara), é passé a mioura vita entratant la nuet dai 14 de fauré, puech denant che complì 75 agn. Erich é dessegur una de cheles personalités de maioura emportanza per l’economia de Mareo y ence dla bassa Val Badia.



Chersciù su te na familia scempla, ti él dagnora ju do a sies idees, cherdan te cie che al fajova. Al eva sté chel che ova atira capì cie potenzial che al fossa sté tl sport da d’invern. Deberieda con valgugn amisc àl endò brancé ite la scola dai schi d’Al Plan do la vera, fajan l ejam da maester de schi dl 1954. Desche atlet dai schi s’àl fat n inom, tamben che desche alpinist. Dl 1967 à Erich Kastlunger metù man la concuista dal Plan de Corones, fajan su l skilift dla Miara. Con i agn é l svilup ju inant, i lifc é gnus deplù, les sozietés é chersciudes y con eles l potenzial turistich d’Al Plan. Dl 1982 à Erich dal Medo revoluzioné l’industria dal sport da d’invern, portan adalerch l prum canon da la neif da l’America ca. Empruma fòvel prest gnù coioné, ma a la fin àl abù rejon. Sot a sia regenza é la sozieté dai lifc d’Al Plan gnuda una dles istituzions economiches plu emportantes dla bacheta, en plu s’àl ence interessé dl setour energetich te duta la Talia. Sia é steda l’idea y la iniziativa dla ciampana "Concordia 2000" de Plan de Corones, che lascia rondenì sie son vigni domenia y vigni santou. Un dai soms sportifs de trueps é gnù realisé en l ann passé canche al é gnù fat la pista « Erta » (foto: entratant l tai dla veta) a Al Plan. Avisa Erich Kastlunger y sie compagn Hans Erlacher l’ova daurida ai 14 de fauré dl 2003 - Erich fova sté l prum da raité ju con i schi. Y desche l destin essa volù, s’en é Erich dal Medo ju per dagnora avisa un n ann dedò, ai 14 de fauré dl 2004. Ma sies operes y sie recort romagnarà per dagnora.


 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.491 seconc