benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

André Hofer enlaouta y encuei?
scrit ai 14 February 2004 da les 09:39:48 da noeles

Politica

 

Ala buta, la mesura é plena!

Les oujes vegn aldidancuei compredes - Pensiers soura l aniversar de André Hofer

de Lois Trebo

Vigni ann végnel recordé che André Hofer é ai 20 de fauré dl 1810 vegnù sclopeté a Mantua. Hofer ne ova do Gnissant dl 1809, desche d'autri comandanc de Tirol, nia dé ju les ermes desche l comando franzeis ova lascé placaté. Hofer fova vegnù uzené su da chel fanaticon de capuziner Haspinger da Gsies. Trueps se ova tegnù a chesta clameda, ma die ne nia duc. A chesta fosa à i franzeisc lascé sclopeté demé te Puster 25 persones che ne ova nia olghé. I gragn fova jus a s'ascone.



P. Haspinger y l Speckbacher s'en fova tabachés fora per l'Austria al segur, Peter Sigmair da Valdaura fova ju a s'ascone encer Piz da Peres; i franzeisc manaciova da copé sie mut, sce al ne fossa nia vegnù a lum, y perchel se ova Peter Sigmair enstes prejenté ai saudés franzeisc che l'ova spo sclopeté. Enscì ti ésela ence juda a Peter Mayr, l ostier "An der Mahr" sot a Persenon. Y nost André Hofer pa? Chel s'en fova ence trat con la familia sun la Pfandler Alm te Passeier. N tel canaia de Passeier ti ova giaté na tel gola ai scioldi che i franzeisc ti ova empermetù a chel che ti essa embanì l asconadoi de Hofer.

Chest diau de n canaia ova mené i saudés franzeisc sun la mont a pié Hofer. An l'ova spo condut a Mantua y dailò é Hofer gnù condané a mort y sclopeté ai 20 de fauré dl 1810. Ala à duré agn enfin a che Tirol ova metù man da tegnì alaut chisc "  terrorisc'" dl 1809; enscì  ti dijova i talians i agn 1960 a de tei y Putin encuei ai cecens. Dessegur ài combatù per la liberté de Tirol, ai volova  percuré demez i saudés foresc' y vegnì enstesc patrons de sia tera. A la fin s'en fova ence i gran comandanc sciampés a s' ascone, ai savova che ai vegniva copés.

Hofer sun auté, Tirol n marcé !
An se damana: ciuldì végnel pa fat festa a André Hofer  y a de si compagns? An vuel onoré y recordé l coraje che ai à abù da jì contra na dreja de cotant deplù saudés y ai à prové da defene sia tera, da percoré demez i foresc'. Chisc oms de Tirol eva enlaouta jent dret cristiana; nosc avons ova dl 1797 empermetù a Balsan al Cuer de Gejù sia fedelté sce ai vegnissa stravardés dal nemich. Dl 1797 ti fova chest garaté a Spinges ( Catarina Lanz). La jent de Tirol fova persones de carater, che fova de parola, plenes de creta cristiana, ala tegniva alaut la familia cristiana, osservova i comandamenc! L fat che la jent da encuei tira dutaorela gen ca André Hofer con si daidadours y la generazion de Magnago desmostra che i oms politics da aldidancuei ne ti fej deguna imprescion, ne mostra nia carater (les oujes vegn compredes da na propaganda mata y dai contribuc che regor piec co les sterceies). I oms da encuei n'à nia ideai che tire; an se strita per les lueges y les enciaries da corì che porte cianestri de scioldi te cianeva, la familia cristiana ne conta pu nia plu, an la lascia jì en broda, an ouj i sacramenc desche ai va ben per na vita comedoula. Al mancia l'entusiasm da na outa. Olà é pa i idealisc' che dess laoré per l ben dla jent ? Encuei végnel demé plu cialé al davagn, al materialism, ai afars, ai mudli de roba che un raspa adum con i comedons. Tirol à dé su l spirit de André Hofer, an ven la tera empede la defene y chest suzédel con la benediscion di gragn che comeda les leges a plajei dai speculanc y afarisc'. Chest ne ova nosc avons (atenac) nia miné canche ai combatova dl 1809 per la liberté de Tirol, per avei Tirol tles mans dla jent de Tirol.

Apel  a la joneza, l sgric ai speculanc!
Encuei végnel venù fora mec paisc per l carnier de scioldi de Iuda y cie che é l plu da fé marevueia: nosc aministradours a Bulsan y tles valedes ciala pro, deguna coscienza ne ti mord pa, ai é sentés biei pascius te sia fraiducia. N'él nia na gran fauzité o fauzeda: André Hofer vegn chisc dis dassen laudé su con si ideai da enlaouta - liberté, patrons de nostes teres -  do le spinel va la svenuda de Tirol dlon spironan inant ! Joegn, dauride i uedli, ala va dla tera che dess endoman ester vosta o voleise vegnì folestiers te vosta valeda? Dedi fer a la plana, lascedeves su, protestede, no cialede pro che i gran speculanc se tol sot si piesc fora vost daciasa, vost sotet. Ala buta, la mesura é plena! Al é gran ora! Tirol se desfej, sce la jent ne se endespra y sce l ejempl de chi dal 1809 ne ti dà nia na dreta scasseda a chi che miena da ester ciamò n puech patrioc. 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.378 seconc