Scrive y adoré l lingaz ladin te contesc' aministratifs
"Projet Bilinguism" - Al rejonarà Consantin Pitsch sun "La pusiziun dal Rumantsch pro Confederaziun e Chantun Grischun" - An vuel fé n laour linguistich endertura - Fascia ti sciampa dant a Gherdeina y Badia
Les encontedes tl cheder "Projet bilinguism" enviedes via dal Comprensore Ladin de Fascia, Servisc Linguistics, va inant ai 25 e 26 de fauré che vegn, tres da les 14,30 tla sala grana dl Comprensore. An vuel con chestes scomenciadives crié sensibelté per l lingaz y la standardisazion linguistica te contesc' aministratifs. L Comprensore Ladin de Fascia despon enscí de n ofize per servisc linguistics che enstradeia la ofizialisazion dl lingaz ladin. Endò n iade veiden che Fascia é la valeda ladina plu daverta y con plu spirit inovatif tles Dolomites che sà ence da cialé soura sie vilin fora.
Ai 25 de fauré vegniràl fat l secont workshop entournvia la traduzion de modui, tabeles y leges;
ai 26 de fauré saràl da audì l prof. Constantin Pitsch (Ufize Federal dla Cultura - servisc per les comunanzes linguistiches y culturales dl Cianton Grijon/Svizra) che tegnirà n referat sun l argoment "La pusiziun dal rumantsch pro Confederaziun e Chantun Grischun". Atira dedò prejentarà i professours Iannàccaro y Dell’Aquila a chi che à tout pert al cors valgugn sclarimenc a revert dla politica y dla legislazion linguistica tla Finlandia.
