N stude sbaujiareia n mit fauz a revert internet

Persones nia plu soules, sce ales navigheia te internet: chest dij les ultimes archirides scientifiches

(if) L internet ne fej nia strassomié si anuzadours te persones desparidledes y spavies desche an temova y minova. Chest é l resultat de na enrescida internazionala che la UCLA (Center for Communication Policy) à porté a termen deberieda con trueps istituc de archirida. Per ruvé a n resultat tegnent àn intervisté ti ultims 3 agn passa 30.000 persones che viv te 14 statesc dl mond. "L mit che l navigadour de internet se isoleie sozialmenter é vegnù clermenter sbaujiaré", sintetiseia l diretour dl Istitut europeich di media, Jo Groebel, l resultat.

(sit internet: http://www.eim.org/). I anuzadours de internet é sozialmenter plu atifs che i spetadours dant a la televijion.

Chest ne vuel samben nia dì che enrescides sun chesta tematica di ultims agn sie daldut faledes. L emplei de internet se à deslargé fora de gre en gre a tacia de uele: "i navigadours te internet corespon entratant a na despartizion normala tla popolazion", enscì Groebel. I navigadours de internet demendresc sourafora sie consum de televijion.

Aladò dla enrescida consumeia i navigadours de internet mesanamenter cinch ores de manco de televijion a l’edema, trend che an à empruma osservé ti Statesc Unis y che vegn sen a se confermé soura dut l mond. An pò propi dì che les temes o datrai ence demé l pregiudize che navighé te internet sie de dann a les relazions soziales é daldut ingiustifichedes o enfinamai daldut faledes. Al contrar: "olà che al vegn anuzé internet, végnel corí plulere loces soziales".

Deplù informazions sun chesta enrescida giàten a la miscion: http://www.ccp.ucla.edu/