benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N comentar: Magnago ejempl dal cianton uman-politich
scrit ai 10 February 2004 da les 08:33:31 da noeles

Persones

 

Magnago à abù tla Svp ladina de sclec aconsiadours 

La figura de Magnago conscidreda te sia personalité y te sie laour sozial. Plu iadesc s’òvel baudié dla puecia coscienza d’identité di Ladins 

de Umbert Cians

I dis passés él gnù recordé y festejé i 90 agn de Silvius Magnago, l gran protagonist dla storia de Südtirol. Dessegur na gran personalité tamben dal pont de oduda uman che da chel politich-sozial. Da joen saudé te vera, y apeina maridé, òvel messù se lascé taié na giama. Trueps te sia condizion essa fat da chel moment inant l invalid y basta, ma el no. Con l’aiut de sia femena (morta da puech) che é atira juda sun l post per ti sté dlongia te n moment de gran soferanza, s’òvel tegní su y é ju inant con gran dignité y coraje. N ejempl che dà forza y orientament a trueps che volessa la dé su, lascé ester. Te chisc ultims agn òvel rejoné truep a les persones de temp, a cheles che viv tles Ciases de paussa, dijan plu gonot: “Ence sce i tomeis y i cogoleis ju per les sciales, provede a vigni moda de fé da soui, de ves auzé su zenza cherdé aiut, provede de resté tresfora autonoms”.



Tl ciamp politich àl anuzé bon sies conescenzes giuridiches per davagné n vare endolauter la vera con Roma per l’autonomia de Südtirol. N grumon les dificoltés, ma sia determinazion y sia elastizité politica à madurì i fruc che nos podon sen nes giaude. El enstes reprejentova te sia persona ferida l’umiliazion dla mendranza todescia sotmetuda. Sté en pé ti costova datrai dessegur cotant, ma al l fajova pensan al davegnì de sia mendranza. Sie sacrifize à enredù per duc. Na persona daverta al sozial, a la cultura ence tres l contribut finanziar a les unions culturales, a la mujiga, al teater y e.i. Tò ite i joegn, i daidé te si interesc, crié animazion é tres sté n puech sie cruze. Tl 1985 él ju a ti cialé a Savognin ti Grijons a la desfileda organiseda en gaujion di 2000 agn di ladins. Propi chilò àn podù audì sia esprescion: “Pu, olà é pa i joegn?”
Politicamenter éssel fat deplù per i ladins, sce al essa abù dlongia, desche aconsiadours, persones plu coscientes dla identité ladina. Aldò che al dij Franz Vittur te sie liber “Ein Leben, eine Schule”, veiden che chest ne n’é nia suzedù. Al é cler che Magnago pensova dantaldut te sie laour ai todesc de Südtirol crian indiretamenter enscì ence n ben per i ladins, ma diretamenter per ei él demé ju valch fregola, ajache i politics ladins ne s’entopova nia da damané o ne volova nia. Les ghiranzes é tres vegnudes manedes inant da privac, da les unions, ma i politics les blocova. Magnago enstes à dit plu iadesc che al manciova la coscienza ladina y da om de politica rejonòvel souradut a chi dla politica. Magnago à pensé a la ciasa ledia y autonoma, ma la mobilia daite, la biblioteca, i ciofs sun solé y e.i., dut chest ti àl sourandé a la jent. L ornament, les scrites sun les viles, fora per i paisc, fora per les stredes, a dut chest essa pa ben podù pensé i ladins enstesc, encandenò l ài sourantout dai todesc y chest ti savova demarevueia ence a Magnago.

 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.358 seconc