Vincent Augustin uss al timun da la Lia Rumantscha
Avertura da la perioda d'uffizi 2004-06 - En il center: las strategias per il futur - co agir politicamain per avair succes - Rumantsch Grischun en scola - Effizienza e dinamica
En la seduta da constituziun ed installaziun metta Vincent Augustin (foto) l'incumbensa primara da la LR en il center - mantegnair e promover la lingua e la cultura rumantscha e stgaffir identitad. La suprastanza da la LR sa cumpona da 5 commembers/-ras, d'in president e da 4 represchentantAs da las uniuns regiunalas. Tenor tschentaments sa constituescha ella sezza cun excepziun dal president che vegn elegì directamain da la radunanza da delegads e delegadas. Sco vicepresident per la proxima perioda d'uffizi vegn elegì Martin Cantieni (Renania). AssessurAs èn: Men Janett / Uniun dals Grischs, Luzia Plaz-Sonder / Uniun Rumantscha da Surmeir ed Erwin Vincenz / Romania.
Sper las disposiziuns persunalas è sa deditgada la suprastanza a l'introducziun en l'incumbensa strategica da la LR. Tge è la sfida primara da la suprastanza LR? Nua èsi da metter accents l'onn 2004? - Ils trais puncts principals per 2004 èn:
- L'instanza - co agir per avair politicamain success?
- Las structuras - tge è d'interprender per metter sin via structuras che permettan dapli effizienza e dinamica era cun la 'basa'?
- Il rumantsch grischun en scola - tge po e sto la LR contribuir?
En trais dietas tematicas en il decurs dal proxim trimester vul la suprastanza prender las decisiuns da princip.
Plinavant ha la suprastanza prendì invista en ils champs operativs dal manaschi. Tge fa il servetsch da linguisitca applitgada, l'uschenumnà SLAR? Co funcziuna il servetsch da translaziuns? Nua èn ils accents ed ils problems da la collavuraziun regiunala? Tge fa la chanzlia da la LR e co statti cun la scolina rumantscha?
Latiers ha la suprastanza da la LR decidì da sustegnair diversas occurrenzas ordaifer la LR, sco per exempel contribuziuns al project "Cudischet dil vitg" ed al film rumantsch "Pizzet" dad Ivo Zen.
Paroles da se recordé che vegn dant gonot:
uss = sen
Latiers = laprò
ordaifer = foradecà
