benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Abilitazion dl doz.univ. dot. Paul Videsott
scrit ai 04 February 2004 da les 14:13:36 da noeles

Persones

 

Paul Videsott é sen Dozent universitar!

Ai 30 de jené  2004 àl arjont l titul de “Dozent dla Filologia Romanica” con n stude pioneristich: "Analises scriptologiches y scriptometriches de tesc' per talian dal nord vedl, da empruma encà enfin al 1525"

(dc) La gran sodesfazion podòven ti lieje tla musa te chel che al s’en vegniva fora dal salf dles reunions “University of New Orleans” dla Université da Dispruch. Paul Videsott, romanist tl istitut de competenza dal atené tiroleis ova mefodret giaté la nomina a dozent universitar. Con chest gran travert arjonj la cariera academica dl joen d'Al Plan de Mareo per l moment l pont plu aut. Cie che al à arjont enchin a sen à carater ejemplar y se merita da vegnì conté su.



Al à sclut ju l stude dla romanistica te n curt temp, tegnian entratant ence i prums cursc de ladin a l’université. Al à spo metù man da laoré desche assistent universitar pro sie professour, Dr. Guntram Plangg, al à publiché l “Vocabolar Mareo”, à colaboré a la realisazion dal ALD-Atlant linguistich dal ladin dles Dolomites” y é sté a la pert tl projet de planificazion linguistica SPELL per svilupé n lingaz standard scrit per i Ladins. Sie gran laour soura i cognoms ladins ti à joé desche dissertazion. Per sie gran meric scientifics tl ciamp dal lingaz ladin, à Paul Videsott bele giaté trueps pesc' emportanc: l „Walther von der Vogelweide Förderpreis 1999“, l pest scientifich dla fondazion „Luigi Heilmann 1996 y 2000“, l „Theodor-Körner-Preis 2001“ ti é vegnù sourandé personalmenter dal President austriach Thomas Klestil. Dl 2002 àl spo ence giaté l pest de archirida scientifica „Forschungsförderungspreis des akademischen alpinen Vereines Innsbruck“ y l ann passé ciamò l „Lichtenstein-Preis“ per l’archirida tla Université da Dispruch.

Ai 30 de jené à spo Paul Videsott messù se prejenté dant da la comiscion de abilitazion per porté dant a ousc i resultac de sie laour scrit. Al s’à astilé con gran maestria, tamben tla relazion che ence da respone a les domandes dai comissars. L titul de sie laour: “Padania scriptologica. Analises scriptologiches y scriptometriches de tesc' per talian dal nord vedl, da empruma encà enchin al 1525.“ Chest laour che à carater pionieristich tl raion linguistich talian, analiseia l svilup dla produzion de scritures nia-leterares (Skripta) dant l 1525. Pian via da na basa de prest 900 tesc' da 36 zentri de scritura dla Talia dal nord y da na lingia de 320 criteres, desmostra Paul Videsott, che cheles scritures che se lascia ascrive a n ambient dialetal dal nord vegn tres demanco tl temp y vegn rogosedes da formes de scritura toscanes. Chest prozes de “toscanisazion” vegn definì cronologicamenter y cuantitativamenter con l aiut dai criteres anunziés endant. Enscì pòl vegnì giaté fora chi zentri de scritura che s’à daurì de sia bona a les novités toscanes (Milan y Aunejia) y chi che s’à endere paré plu giut (Torin, Udin). I motifs de chest comportament desvalif pò ester de carater geografich, storich, economich y linguistich.
Do na consultazion scialdi curta da pert dla comiscion de abilitazion é Paul Videsott vegnù cherdé ite tl salf dles encontedes y é spo tost endò vegnù fora, con l titul de “Dozent de Filologia Romanica” te gaiofa. 


 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.405 seconc