Scomenciadiva internazionala per tegní su i flums de posta refudam (spam)

36 aministrazions de 26 statesc informeia sen impreises soura i sistems de posta eletronica daverc y vuel aridlé i canai dla posta-refudam

(if) La "Federal Trade Commission (FTC)" americana envieia, adum a d'autres aministrazions similares de ben 36 statesc: organisazions, providers y impreises, de scluje si sistems de ortiament de posta eletronica ("relay / proxy-server") enfin a sen empontaut daverc. A chesta maniera déssel vegnì smendrì i flums de emails refudam. Les aministrazions à identifiché milesc y milesc de servers empontassú daverc. A chestes impreises ti àn mané letres con l envit de aridlé l ortiament zenza miscion originara. Te chest stàl l problem: servers incumpedés azeta emails da sistems nia autentifichés y les mana inant ai destinatars zenza fé n control.

 Al vegn asconù enscì la dreta adressa dl ortiant dla email originala. La operazion denomineda "Operation Secure Your Server" vuel informé impreises de soluzions scemples y nia ciaradouses co che ai pò seguré miec si sistems da meladoranzes. "L Govern di Statesc Unis ne ciafia nia plu de afronté chest problem refodam eletronich (l enscidit spam) da soul. Vignun che à n coliament a internet ciafia da contribuí a na soluzion, empede ester na pert dl problem.", enscì l comunicat dl FTC. I statesc che fej empera, dlongia i Statesc Unis, é l'Albania, l'Argentina, l'Australia, l Canada, l Brasil, la Bulgaria, l Cile, la Columbia, la Danimarca, l Ecuador, la Finlandia, la Ungaria, la Jamaica, l Giapon, la Lituania, la Norvegia, l Panama, l Peru, la Romania, la Serbia, l Montenegro, Singapur, la Corea dl Sud, la Svizra, Taiwan y la Gran Bretagna.

L FTC à enjigné ite n sit, olà che an giata deplù informazions sun chesta iniziativa: http://www.ftc.gov/bcp/conline/edcams/spam/secureyourserver/index.htm