Eniann "25 agn Union Scritours Ladins Agacins"

Dl 1979 é pieda via l'ativité dla Union con les prumes publicazions jornalistiches - Ala à tres laoré te na vijion interladina

La Union Scritours Ladins Agacins complesc chesta outa, plu avisa tl meis de fauré, i 25 agn de ativité jornalistica. Enlaouta òven metù man con prums articui tl foliet Alto Adige y sun l Dolomiten, n pice cianton empruma, che é vegnù amplié enfin a ruvé a does plates a l'edema per valgugn agn sun l sfuei Alto Adige. Na ativité dedicheda deplen a tematiches ladines: politica, lingaz, cultura y opinion. Duc chi che à scrit per sfueis sà che l laour de jornalism y dl scrive laours leterars é dut auter che saurì, sfadious, ghirent, pernanche al souravarieia la scempla cronica y l articul de ocajion. Jornalism y scrive ne é nia demé descrizion, ma ence ti cialé a les cosses dovia, fé critiches, mete a confront y dè stimui. Chest à la Union, dantfora sie president, siour Berto Videsott, dagnora cialé de fé. Ence,  sce chesta outa - per l prum iade - ne ti él nia gnù paié fora (sceben conzedù) l contribut de 5000 € dal assessorat a la cultura ladina, à la Union empò endò mané ite la domanda per ti la sotmete a la Consulta. I reporton al intern l program de ativité per l ann 2004.

Relazion d'ativité
programeda per l ann 2004

Al Govern Provinzial de Bulsan

La Union Scritours Ladins "Agacins", de chela che al fej pert ladins de dutes les valedes dl Sela, ma ence dl Friul y dl Grijon, se tol dant de realisé entratant l ann 2004 chestes ativités:

1. Informé i Ladins dles Dolomites sun cie che al suzed te duta la Ladinia, dal Grijon al Friul, mantegnan i contac leterars, jornalistics y de ert per avei n confront de cie che al vegn fat foradecá. Chest comporta la partezipazion a les sentedes y conferenzes dles Unions di Scritours furlanes y grijones. A chesta maniera déssel vegní garantí n engiame (barat) costant de idees anter i trei raions. La Union vuel organisé una de chestes encontedes ence tles Dolomites.
2. Laoré per fé cresce la coscienza interladina tl cheder dles Dolomites. Chest vegn dantaldut realisé con la plata ladina tl foliet Alto Adige che embracia dutes les valedes y en plu tres l sit internet che cuei adum te n archif duc i contribuc jornalistics y leterars che sará tlaruveda dessegur de relevanza per la mendranza ladina. Per realisé chest pont adóren l contribut de esperc de cultura, daidés da esperc de informatica.
3. La Union di Scritours ti dá n gran peis al lingaz ladin, merscia prinzipala che nes desferenzieia da nosc vejins, y se bat per che al vegne adoré l plu che al è meso publicamenter. Che l ladin vegn adoré sun i majers foliec Alto Adige y Dolomiten é steda na arjonta – zenzauter storica - dla Union di Scritours che auda da vegní mantegnuda y amplieda, davia che ala ti pieta ence a nosc conzitadins todesc y talians la ocajion de conesce la realté ladina. Entratant pòn bele constaté che al vegn metù plu averda a chestions ladines. Ence de chest vers volessa la Union endò dé valch sburla con manifestazions y dossiers.
4. L laour da scrive, nojel dl’ativité dla Union di Scritours, sibe informazion che laours leterars, se ghira truep temp de stude, de archirida, ma ence costimenc valgamia auc per viadesc, telefon y material fotografich. N scritour o n publizist ladin l’á de chest vers cotant plu ria, davia che al ne ciafia nia da da cueie su da fontanes (agentures de stampa y d’autri canai de stampa), ma mess fé dut cant enstes, en plu zenza poscibelté de podei vene sie produt per se autofinanzié.
5. La Union constateia con plajei che trueps articui é vegnus sourantouc da d'autri media ladins, aladò che la Union á defat bele na certa funzion de agentura, dal moment che ala despon tres la publicazion sun internet de n strument atualmenter unich per l raion dles Dolomites.
6. Con dutes chestes bries vuel la Union promueve y sporje la poscibelté a persones interessedes de scrive ladin endertura te contesc’ jornalistics y leterars che é i ciamps de ativité prinzipala dla Union.

Balsan, ai 29.01.2004

L President

Berto Videsott

Relazion sun les ativités dejoutes entratant l ann 2003 

L'ativité prinzipala é steda chela de mantegní y de svilupé inant la PLATA DI LADINS sun l sfuei da vigni di "Alto Adige", de mantegní i contac con dutes les valedes ladines dl raion dles Dolomites, ma ence con i scritours furlans y rumanc. Al á regolarmenter funzioné l barat anter i Agacins y valgugn jornalisc´ grijons che laora pro l sfuei "La Quotidiana": barat de informazions, ma ence de articui. Les relazions é garatedes tres y plu granes souradut sun la linguistica, l lingaz standard, i mass-media. Dantdadut án fat conesce les scomenciadives metudes a jí da una y da l’autra pert tl ciamp leterar, linguistich, dla scola, dl teater y d’autres colaborazions leterares y sozio-politiches.
Valgugn sozes Agacins á daidé pro l Radio y la Televijion ladina, pro La Usc di Ladins y pro cotant de autres unions propi tl ciamp dla stampa y dles publicazions. I scric, i contribuc per la Plata da pert de studenc universitars, fossa stés cotant maiours, sce an essa podú ti dè valch deplù.
La Plata di Ladins ti é tres y plu steda do a la situazion particolara di Ladins da Souramont, sburlan do che Bulsan i dae na man tl vers dl radio y dla televijion ladina.
Gran é stè l laour de impostazion y de svilup dla iniziativa dl sit www.noeles.net con laprò l forum. L’intenzion fova chela de mete su na sort de "Agentura d’informazion" per daidé i media ladins. L sit Noeles.net é vegnù porté inant da volentars, con sacrifizes y spenores personales. La cualité dl sit se à miorè demeztroi.
Entratant l ann é pieda via la scomenciadiva de n curs per l Ladin Standard, curs che va dutaorela inant y che à n gran suzes. La Union Scritours Ladins Agacins se á dantaldut informé sun les tecniches per mete a jí n curs de ladin standard. Ala ti é garateda de giaté i tecnics de informatica, i esperc de linguistica y i esperc de grafica y de i fé laoré adum. Al é gnù fat empruma na lignora de ejempli, de sperimentazions y con jugn án podù mete man con l dret curs a chel che al á tout pert entourn 20 persones. L program y la prejentazion dl curs é de gre en gre miorés, arjonjan 12 lezions.

Bulsan, ai 28.1.2004

L President

Berto Videsott