Na revoluzion te internet: blade-servers miniaturisés con prozessours pentium-mobils

Fujitsu-Siemens à anunzié unités de mini-servers nuefs con prozessours Intel-Pentium-Mobile per i "blade-servers" Primergy BX300.

(if) N "blade" é, dit en curt, n server en miniatura. Duc i enjigns che fej fora n server giata lerch sun na scheda unica. Desche an pò vedei sun l'imaja él arconcé adum enfin a 20 "blades" (lames) te n sistem unich. Chesta sort de sistems vegn dantdaldut adorés da internet-providers che mess garantì la desponibelté de si servisc 24 ores sun 24 ores, 7 dis sun 7 dis. Na souraciaria de laour, degun problem; ala vegn partida su automaticamenter sun de plu mini-servers. 

Sce un n o l auter blade se sclapa, sourantol atira n auter blade sia "enciaria", zenza che zacai messe intervegnì . Pro i sistems blade é i singui servers posizionés suvers te n sub-chassis che giata lerch te n armé da 19 polesc. N chassis de trei unités (3 HE) pieta lerch pro i primergy BX300 enchin a 20 blades. Fujitsu-Siemens (FSC) pieta armés de ben 45 unités (empede de 42 unités), chisc ciafia enscì da tò su enchin a 300 blades.

Enfin a sen fòvel dantman blades con un o doi prozessours dla lingia  de costruzion pentium-III y con mascimal 2 GByte RAM de memoria, entratant él sun l marcé blades con prozessours mobils Intel Pentium M con na frecuenza enfin a 1,6 GHz y n consum energetich dret bas. Chisc blades pòn enjigné ite con 4 GByte DDR de memoria y opzionalmenter con na scheda de  64-Bit/66-MHz-PCI. Chestes schedes PCI pò per ejempl vegnì anuzedes per n coliament a fibra otica o per d’autres portes dla sort GBit-LAN,  ma dailò blocheieles endere na luegia de n auter blade. L Pentium M pieta tres sie mecanism de calcul y l gran L2-cache na performance auta.

L cost dl implant é de 20.000 Euro.