Co manejé endretura CDs y DVDs?

An dess mete via i discs suvers te n ambient sut, scur y relativamenter freit

(if) L "National Institute of Standards and Technology"(NIST) à publiché sun sie sit - http://www.nist.gov/ - n stude dret interessant sun l'archiviazion di discs otics. Te na brosciura de 50 plates aconsieia i archiridours l dret manejament de CDs y DVDs. Tl stude, endrezé dantaldut a bibliotecars y archivars,  ti ésen jus do a deplù chestions desche: ciugn efec à pa les emprontes di deic sun la souraspersa? Cie fazion à pa les scrites y les etichetes de coridura? Cales é pa les temperatures ideales? Te cie luegia y co déssen pa stiblé i discs?

I archiridours dl NIST é ruvés danterauter a la conclujion che les etichetes é de regola de dann a les sceibes otiches (discs) y perchel ne désseles nia vegnì anuzedes. Per la archiviazion per plu die é CD-R y DVD-R (chisc media pò vegnì registrés demé un n iade)  plu adatés che media desche CD-RW y DVD-RW (chisc media pò vegnì anuzés plu iadesc).

Al vegn aconsié de conservé chisc media te na posizion en pé te contegnidours de plastica y nia empilés dl viaicà o enfinamai sun rodui. L luech de conservazion dess ester scur, relativamenter freit (anter 4 y 20 grés zelsius) y sut (n tume relatif anter 20 y 50 percent).