benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Jonta Regionala: touta de posizion dl onorevul Bepe Detomas
scrit ai 25 January 2004 da les 21:22:21 da noeles

Politica

 


Per i Ladins él miec na "Region Nueva" y nia na region doia voluda da la Svp


L President dl Govern sudtiroleis Durnwalder se ghira per Mussner la enciaria da assessour regional ladin per mesa la legislatura - La UAL dij nò: miec l ladin dl Trentin per l'entiera legislatura per arjonje na "Region nueva"! Chi la sticarà pa?


de Bepe Detomas/secreter politich dla Union Autonomista Ladina (UAL)


Les declarazions dl president Durnwalder che se ghira na stafeta a mesité de legislatura per cie che reverda la enciaria dl assessour ladin tla Jonta Regionala (mez l temp al aconsiadour ladin lité tla provinzia de Trent y mez al aconsiadour ladin lité tla provinzia de Bulsan), à debujegn de zacotantes reflescions critiches.


L onorevul Bepe Detomas vuel per i Ladins na Region nueva y nia na Region doia, perchel él contrar a les declarazions de Durnwalder.



L president Durnwalder baseia chesta sia ghiranza sun l fat che tla provinzia de Bulsan vìvel 2/3 di ladins tla Region Trentin-Südtirol. Al motiveia enscì chesta sia preteisa con debujegns de carater istituzional y nia politics. Samben podessa chest avei n sens, sce al ne fossa endere nia enscì che dutes les ghiranzes a revert la composizion dla Jonta Regionala, scluta ite la enscidita stafeta anter i presidenc dles does provinzies, peia via da consciderazions porì politiches. Defat, ence sce i ecuilibers anter i grups etnics ne s'à nia mudé cis truep, végnel per l prum iade azeté la poscibelté che la componenta todescia sie valiva a chela taliana tla Jonta Regionala y reconesciù che n sudtiroleis de lingaz todesch posse sourantò la enciaria da president dla Region. Al é daldut cler che, sce an aplicassa a na maniera stara i prinzips invochés da Durnwlader, dut chest ne podessa nience vegnì ipotisé. Per chesta rejon él cler che per cie che reverda la prejenza de n member ladin tla Jonta Regionala méssen tamben apliché criters politics: n ladin dla provinzia de Trent tla Jonta Regionala reprejenteia na ocajion per duc, da una na pert conséntel de smonejelé cheles "scarzedes" de cheles che i on rejoné dessoura y da l'autra pert ti végnel consentì ai trentins de nen vegnì fora a cef aut, zenza zede demassa, cie che podessa vegnì interpreté desche debleza dant a na minonga publica che ti ciala bele con gran festide al davegnì dla istituzion Region. Ie creie che te duc déssel prevalei la coscienza che al se deura na ocajion importanta per la costruzion dla "Region Nueva", che ne pò nia vegnì comprometuda da motivazions blot tatiches.

Metù chest dantfora, les motivazions tl detai:

La mudazion dl Statut de Autonomia tla Region Trentino-Südtirol, con la reforma dl sistem lital tla provinzia de Trent y la atribuzion a les provinzies autonomes dla competenza sun sie sistem istituzional y l reconesciment de valgugn derc importanc al grup ladin, sie tla provinzia de Trent che tla provinzia de Bulsan, à fat strassomié cotant i ecuilibers istituzionai y politics bele consolidés tla Region.
Tl particolar, l fat che l legisladour costituzional ae vedù dantfora la prejenza de n ladin tla Jonta Regionala vuel dì che an à volù ti reconesce n rodul determinant al terz grup linguistich tla Region. Chest deventa plu cler, sce an se tegn a ment l fat che na tel norma ne é nia vegnuda metuda ite tl ordinament dles provinzies. Perchel él al intern dla Region l luche olàche i ladins - na comunité che viv a ciaval di doi confins provinziai y che à abù dagnora na funzion de contat/plomac anter l mond talian y todesch - che é cherdés a porté ite sie contribut istituzional. Cie che é ciamò plu significatif é che chesta poscibelté é vegnuda veduda dantfora sen che an rejona tant dl davegnì dla Region.
Atualmenter réjonen dla composizion dla Jonta Regionala y i Ladins dla UAL (Union Autonomista Ladina) revendicheia con forza sia prejenza al intern dla Jonta Regionala y dij clermenter de ester contrara a la "stafeta" a mesité de legislatura anter i aconsiadours ladins dles does provinzies, (Chiocchetti Luigi y Mussner Florian, ndr), proponuda da Durnwalder. Ala dij chest per motifs desvalifs, dantfora de carater istituzional: la zentralité atribuida dal Statut de Autonomia al assessour ladin che l à volù tla Jonta Regionala, lascian da na pert les logiches politiches y proporzionales, va en conflit con n rodul marginal che vegnissa a s'al dè con enciaries doples, vuel dì sce n assessour provinzial corissa ence chesta enciaria. Na autra rejon, davia che al fossa la pruma outa che al vegn azeté che la componenta todescia tla Jonta Regionala sie valiva a chela taliana y reconesciù che n sudtiroleis de lingaz todesch posse corì la enciaria da president dla Region. Per la Svp fòssel n suzes nia da puech.
Clermenter reprejentassa te chest cheder la nomina de n assessour ladin tla provinzia de Trent n parzial reecuiliber anter les provinzies. An ne pò nia ascone via l fat che sce l assessour ladin fossa dla provinzia de Bulsan essa la Jonta Regionala 3 raprejentanc dla Svp sun 5. Chest fossa rie da glotì per la minonga publica trentina, ma ence da chela taliana dla provinzia de Bulsan che veid con festide chesta fasa de vita dla Region y valutassa negativamenter vigni zediment ti confronc de n partì che ne à mai asconù via de conscidré la Region con edl freit, sce nia con ostilité y desche na istituzion oramai supereda. Te chest moment, envers, végnel daurì na fasa interessanta per na configurazion nueva dla Region, con does provinzies che se à declaré a una de rejoné deberieda. La partida é una de cheles che al paia la mueia de vegnì juiedes; perde chesta ocajion per ti jì do a afermazions politiches tourbles ne fossa nia da fondament.

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Jonta Regionala: touta de posizion dl onorevul Bepe Detomas (ponc: 1)
da Stefo ai 26 January 2004 da les 10:12:00
(Infos sun l utilisadour | Ti mané n messaje privat)
Chilò veiden endò n iade les gran desvalivanzes anter Svp ladina y Lista Ladins o UAL ....
La "invenzion de Durnwalder", Florian Mussner, ne reconesc nia i Ladins fora dla provinzia de Bulsan, al fej demé l interes di todesc. Tla Jonta Regionala jìssel demé per blochè sun comando de Durnwalder


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.393 seconc