L dormì promuev la creativité
Al é vegnù confermé che feter l 60% dles persones che à tout pert al esperiment ruva plu temporifs a na soluzion, sce ai à dormì per n valgunes ores puech denant.
(if) Scienziés dla Université de Lübeck y de Köln à per l prum iade podù pié do proes esperimentales che l dormì alesireia cotant la creativité. Ullrich Wagner dla Université de Lübeck y si colegs à encuei publiché i resultac esperimentai tla edizion atuala dl foliet scientifich "Nature" (edizion 427, 22. de jené 2004,a plata. 352).
A les 66 persones partides su te trei grups ti òven metù dant na lingia de series de numeres metudes adum do na varianta dla metoda "Number Reduction Task" svilupeda dai scienziés Louis y Thelma Thurston. Ai ova giaté la enciaria de elaboré na seria de 8 numeres do does regoles dedes dant per ruvé a la soluzion de n numer unich. L temp adoré per ruvé a la soluzion vegniva vigni iade anoté . I partezipanc ne savova endere nia che les series de numeres fova metudes adum a na tel maniera che ai essa podù giaté ence n troi aslum alternatif per ruvé al dret resultat.
Les 66 persones messova spo jì do l prum rode de eserzizes a dormì per ot ores o resté entratant l di o la nuet en pe. Dedò ti òven metù dant endò i medems compic. Feter l 60% de chi che fova jus a dormì ova giaté fora entratant l test l troi aslum de soluzion, depierpul che di autri grups demé l 22% fova ruvé a chesta soluzion aslumia. I scienzés pò fé entratant demé ipoteses a revert di mecanisms che conduj a chisc efec.
