Salut a n cer amich

I biei menuc passés con Markus

de Berto Videsott

A se vedei, Pater Markus. La puera jent, i confredesc y les autorités te à saludé te dijan dilan per les bries per i emarginés. Truepa pesc dla zité da Bulsan é vegnuda garantida da tie laour, dì per dì, dan na picera sodesfazion a les persones tl bujegn y che a chesta moda dova altamo n puech plu tria, empede magari sclapé su valch o ciavaté / dramé valgugn. I nes on vedù plu iadesc sun la streda di francescans, olà che al fova tie magasin y tu cialoves da porta fora per rejoné con chi che ova clocheré. Gonot fòvel stritaries dant chela porta, ma can che al gniva fora tie cef, fòvel endò pesc. I vejins, i “bogn catolics”, ne te volova nia ben, propi per la jent che vegniva a te fé vijita.

Plu iadesc me aste conté che al fossa sté plu giust mete te perjon i genitours de chisc pueresc joegn, che n’ova giaté deguna educazion. Tia prejenza à emparé a conesce tant de miseria, per l plu frut dla malavita, dla “Untugend”, desche tu dijoves. Con tia pazienza y tie laour aste dé na bela imaja dla Gliejia, dla atuazion dl Vagnele y i trueps joegn che á tout pert a la Messa t’à rengrazié. La malatia te à costé plu di sacrifizes per la puera jent, ma te as tegnì fora con fede y rassegnazion ence chela. Sen ieste lede y benedì da Idie.

Dilan per tie ejempl.
Siur Berto