Union Generala di Ladins: "Conesce y se fé conesce!"
11 aconsiadours - L Consei dla Union Generala di Ladins arà a cef n “Ofize de Presidenza” - Projec prinzipai: Spell y La Usc di Ladins.
de Lorenzo Soratroi
Do n meis da la lita a president nuef dla Generela à Nani Pellegrini clamé ite la pruma senteda dl consei diretif. I undesc componenc dles cinch valedes (al falova demé la presidenta onorara Hilda Pizzinini ) s’à abiné ta Fodom, olà che ei à abù l’ocajion de vijité ence l Zenter Levines de Reba. Dilan a la desponibelté dl dot. Sommavilla, che é da Col , à abù i aconsiadours dutes les spligazions sun l funzionament dl Zenter da pert dl dot. Gnech y per chel che à da nen fé con la meteorologia da pert dl dot. Andrea Crepaz “Mariuc”. Ence sce al fova la pruma senteda, à l president nuef tost metù sun meisa argomenc concrec de laour. La pruma novité é chela dl’istituzion al intern dl consei de n “Ofize de Presidenza”. De chest comité de laour fajaràl pert, dlongia al president, l aconsiadour Egon Vinatzer, che é ence vegnù nominé vizepresident, y Fabio Chiocchetti. “Inoms cernus fora nia a caje”, dij Nani, “ma che reprejenteia les trei provinzies. Chest per respeté l prinzip che à condut al renovament dla Generela y che mira a na reprejentativité plu valiva dles unions al intern dl diretif". Sun l retrat da manciancia: l president, dr. Nani Pellegrini, dr. Fabio Chiocchetti y Egon Vinatzer, vizepresident.
L ofize de presidenza ogarà ence per ti dé na man al president a ti sté do a les gran chestions che veid impegneda la Generela. Al fova oramai da temp cler che l president ne ciafieia nia plu da soul da ti sté do a dut.
A revert di programs de ativité dla Generela él vegnù individué chi ciamps, olà che ala é de pruma persona a cef y chisc é l Spell (Servisc per l'elaborazion dl lingaz ladin), entratant nia plu demé n stude, ma n veir projet linguistich interladin integré y l foliet edemanal "La Usc di Ladins". Dal pont de veduda finanziar se tegn l prum oramai en pé sun sies giames, dilan a canai de finanziament consolidés. L secont endere impegneia les casses dla Generela per varié inant, davia che i contribuc ruva a corì demé na pert dles speises de manaje.
L’ativité programeda per chest ann dal diretif dla Generela pò vegnì sintetiseda tres l slogan “ Conesce y se fè conesce” che corespon a trei criteres y obietifs de intervent. L prum chel de mantegnì y de porté inant i projec che interesseia dutes les cinch valedes, co che l projet Spell y La Usc. L secont jirà adencontra ai joegn y al mond dla scola. Al é vegnù vedù dantfora, per ejempl, de contaté duc i studenc ladins dles universités y de mete a jì ocajions de encontedes anter ei per se conesce y se confronté. Una de chestes podessa ester n viade de istruzion a vijité les istituzions europeiches, desche l parlament de Bruxelles. L terz pont individué dal diretif é chel dl arichiment cultural dla Ladinia, n arichiment che pò vegnì souradut con l stimolé publicazions, mujighes, teatri per ladin y dutes cheles esprescions culturales che deida a tegnì su nost descore. (LS:if)
