Na claupa erta y sfadiousa ti toca sen a la Generela
Na organisazion con raijes autentiches, depierpul che la politica dla Svp tla provinzia da Bulsan les chier pro i todesc
de Umbert Cians
Bonamenter tira sen la Svp ladina plu saurì l fle, ajache la direzion dla Union Generela di Ladins dles Dolomites é ruveda soura mont via. Sce an ti ciala n puech plu avisa a la composizion dl consei nuef dla Generela, spo veiden che l majer peis vegn tout ite dai aconsiadours da Souramont y de Fascia. An é zenzauter dant n fenomen nuef che daidarà souradut i ladins fora dla provinzia de Bulsan a tò coscienza de sia identité. Oramai ne n'ései nia plu demé sburlés sun na pert y conscidrés ladins de seconda categoria, ma ei à la direzion tles mans. Anter chisc aconsiadours en él de chi che à dessegur coraje con valch bona idea laprò. I temps s'à mudé, ence la legislazion é ruveda plu damprò, souradut tres la lege 482/99.
Sun la foto: La Ciuita .... "Olá che la Marmoleda col cef da neif sunsom y l Pelf y la Ciuita fej segn a dut Fodom, Gran Sas dla Crousc y Putia, dalonc vignun conesc; sun piz de Col dla Vedla i creps da ciauc finesc, ailò él nostes ciases, chel post olá che i ston ... dij "La Ciantia di Ladins" *claupa=troi ert.
Les novités vegn plulere da ilò enfora, sce an é bogn de giaté cefs che sa da la sfruté. L dialogh che la Generela metarà sen a jì sarà dessegur te deplù direzions, con personalités y politics ence de deplù colours An spera che al sie l moment giust per i ladins da Souramont de daurì na plata nueva souradut tl vers dla politica, de tò dantfora coscienza de volei ester ladins y de laoré dassen per l'unité di ladins. La sburla mess assolutamenter jì da ei enfora, da Bulsan ne arài nia n aiut, souradut sen nia, dal moment che la polenta politica y culturala vegn cueta da un de Gherdeina. N moment storich emportant per la Generela y per l'unité di ladins con raijes y tradizions autentiches. An spera che tla proscima senteda la Generela rejone de chest y no demé de folclor, de manifestazions. Al vuel ence ester chestes, ma finalisedes a...
