benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

I neo-Ladins tl Beluneis se organiseia
scrit ai 13 January 2004 da les 08:05:56 da noeles

Politica

 

L Istitut di Neo-Ladins tl Beluneis met man sies ativités 

Al darà fora na revista scientifica-culturala -  Diretour é Ernesto Majoni  - Vegn la posizion di Ladins dl Sela endeblida?

L’Istitut cultural ladin dla provinzia de Belun, pont de referiment di ensci-nominés neo-ladins, scomencia a se mueve y a mete ju programs de laour con sie diretour, l ampezan, Ernesto Majoni, daidé da na comiscion scientifica. La senta dl Istitut é logheda tla Ciasa dla Comunité montana dla Val dl Boite a Bourcia de Ciadoura. Chisc dis él vegnù enjigné l program de laour per i proscims meisc: na publicazion scientifica-culturala, lezions de ajornament per maestri y professours y d'auter plu. An vuel ence tré a nuz les ressourses finanziares prevedudes da la lege cheder statala sun les mendranzes 482/99.  Enscì se fajarà audì ciamò plu sterch na nueva entité "ladina". Endeblesc l Istitut Ladin MdR, pesiman con l Ladin Standard la posizion di Ladins dl Sela?

Sun la imaja: L Ciadoura a Calalzo. Tl Beluneis, Ciadoura y Agordin, se ál formé ti ultims agn passa 10 unions che reclameia per si teritores de ester ladins. 



Vedù dantfora él ence na colaborazion strenta con les Universités de Padova y de Udin per promueve teses de laurea sun la tematica. Na grafia unitara per dutes les varietés dl teritore de competenza dl Istitut, dantaldut ence per unitarisé les tofles stradales, dess ester l auter vare. Trueps paisc dl Ciadoura porta bele sun les tofles ence la dizion tl idiom dl post sotvia. La revista dess ence daidé tré su studes etnografics, la prosa y la poesìa y reporté dles ativités dles encer 10 unions afiliedes. La comiscion dl Istitut se à metù al laour y an veid dantfora l'edizion dl prum numer chesta aisciuda.

I Ladins de Ampez, Fodom y Col mess bele da agn s'ciampì con chesta entité nueva per se partì su les ressurses finanziares dla lege provinziala y tl davegnì dla lege 482/99. Zenza n liam sterch con i Ladins Selans ciòdei da slizié te chesta direzion. Dantaldut la azentanza de n lingaz scrit unitar pò ti sporje n pont de referiment, de identité, cler y ferm devers l Sela.  Ma desche an sà é chesta chestion ence tla provinzia da Bulsan entratant  metuda sun na pert, da la politica y dal Istitut Ladin MdR.

Studes sun valch vedla ruina, sun toponomastica, sun usanzes y tradizions y lingaz, vocabulars idiomatics, dut bon y dret, ma sce al fala la dreta mesura de lingaz te scola, ti mass-media (program plen te radio-tv y foliet da vignidì che cuer dutes les spartes), dut sot l tet de n lingaz unitar scrit modern, ne souraviv degun lingaz a longia veduda. I ne on nia bria da jì lonc per vedei desche "mendranzes" met tla pratica chestes politiches (Grijons, Catalunya, Paisc Bascs y e.i.). Y dailò él da conzentré les energies. I l vedon y i l audion dì per dì coche ala va juvers. L lingaz ladin se desfej: feter degugn ne ruva fora dla scola de oblianza, savan da scrive endretura ladin, puecia jent l adora dedò ativamenter, les intervistes al radio y televijion fej gonot spavent.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.457 seconc