de Hilda Pizzinini / ex-presidenta dla Union Generala

I à lit con plajei che siur Berto Videsott à na gran conscidrazion dl president nuef dla Union Generela y che al spera ence che al ti vegne contè dut cie che al suzed, a na moda che al posse scrive sun sia plata y "splundré da foradecà y daidé morde via la cresta al nemì", desche al aconsieia. Da n preve essi ence podù m'en avei empermel de chel che al à scrit, ma spo m'ài entenù che al ne conesc nience minimamenter l laour che la Generela à condut inant te chisc ultims 50 agn.

Mia metoda ne fova nia chela de cospeté ju dles persones sun i foliec, ma de jì a rejoné personalmenter con chi che ova valch da dì. An pò ence fé avalei les rejons con de beles manieres, an arjonj deplù che a sclapé maiolica. Tegnì adum i ladins dles Dolomites con trei aministrazions provinziales desferentes, laoré deberieda y se vegnì con les istituzions de dut l raion é stè n laour che à ghiré truep temp, truepa pazienza y tant de diplomazia. Sce ie n'essa fat nia d'auter te duc chisc agn che porvé de fé tegnì adum, essi fat assé. Per cie che reverda les conescenzes fates te trueps agn ne ài nia da me tré dant y per vigni president nuef vuelaràl ester trueps agn enfin che al arjonjarà l medem numer.

"Preibel scutede" é pié via do che plu iadesc fòvel vegnù straout noveles che an dova inant, nes crian nia pueces dificoltés. I m'à entenù che chesta tatica é vegnuda sourantouta da plu organisazions de Badia y Gherdeina. Da mete sotissoura bàstel pueces paroles, ma da se vegnì y laoré deberieda vuelel pa ester truep respet. Al n'é nia demé compit dla Union Generela de varenté i derc dla mendranza ladina, ma ben vigni organisazion é cherdeda a fé chest, perchel à ence i Agacìns sia responsabelté: al podessa vegnì fora na sort de competizion per vedei chi che arjonj empruma l travert.

Siour Berto, i messe dì che al me desplej a scrive chestes cosses, ciuldiche i Ves à dagnora respeté per l gran laour che i fajeis, ma al é sté de plu persones che m’à envié a respone, scenò essi gen scuté (sciche al fova n puech mia usanza). A Vos y a duc i Agacins Ves aodi n ann plen de fortuna y de sodesfazions y "nia empermel".