benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Les lites y l temp dedò
scrit ai 06 January 2004 da les 10:43:47 da noeles

Politica

 

"l todesc se à compré i ladins y ei se à venù"

Per n per de scincundes àn dé su vigni aspirazion a deplù autonomia

de Berto Videsott

 

Dant les lites ova valgugn n gran laour: enaudé mostres, zentri culturai, stredes, tunei, scoles y e.i. Na gran prescia, ajache dut messova ester sclut ju, ruvé dant les lites per podei mostré su tant de cosses che é vegnudes realisedes per merit y intervent de n cert partì. Al vegniva dé fora ciastegnes te vigni piz. A la jent vegnìvel prejenté n retrat soul, con en mus soul. Sen él dut chiet. Cie politica! Dl 1946 (sun l retrat) vegnìvel ciamò porté inant deberieda revendicazions.



Ala se tratova de lites aministratives, provinziales, olà che vigni provinzia pensa a sie sach y met averda de ne ficé mine l nes tles autres. Dut adum na cossa interna, olache an ciala souraldut de podei mioré l livel de vita, de deslargé fora i servisc a ben dla jent, de mioré l trasport, les comunicazions, garantì plu temp lede y les ocajions de devertiment. An proa de tegnì su les unions che se cruzia dla cultura, dl teater, dl cianté; an vuel stimolé l volentariat per ti dé na man ai plu debli, per garantì i servisc che va debujegn te cerc momenc y che ne n'é nia tla lista de chi prevedus dantfora. En curt: an vuel aministré, acontenté la jent te si problems da vigni dì. Chest vel samben ence per la scola, per l trasport, per la sanité y e.i.. An podessa ence dì autramenter: an laora, an se cruzia de mioré te vigni vers, an chier idees, propostes per fé miec. An vuel ester concrec y no demé fé discuscions per la vueia dles discuscions Duc dess se ficé ite, daidé pro per realisé. Al conta i fac y no la politica, ciamò de manco sie colour. La jent conscidreia les lites provinziales a chesta maniera y bonamenter ne vedaràla nia ite duta la vera, les stritaries che va tres empera con les lites: souraldut la vera per l control dl podei economich, giuridich, etnich y linguistich. L grup etnich todesch se bat, a rejon, per ester autonom al mascim, per avei tles mans la richeza dla Provinzia, les fontanes di scioldi, per controlé i setours economics y i servisc publics a na moda da podei brancé ite atira y i enjigné ca tres miec, zenza messei passé per la longia burocrazia dl Stat. I todesc se damana tres y plu autonomia, tres y plu control, ai vuel fé da soui. Ai defen se enstesc. Tla provinzia ései la maioranza, ma ai é na mendranza tl Stat talian. Na mendranza coscienta che se bat per defene dantaldut sia identité, sie lingaz, sia cultura, sie ambient, sie daciasa. Ai á ence i strumenc aldò. I todesc conta y per conté deplù damànei l sostegn di ladins che ai s'á compré con scincundes a condizion che ai dessa su sia autonomia, sie dert a ester mendranza con dutes les ghiranzes che chest dert comporta. I ladins s'à venù y ai ne conta dutaorela ciamò nia: ei ne é nia ti confronc di todesc y ciamò de manco ti confronc di talians che enchinamai coionarà nost lingaz, ajache al ne vegn nia prejenté endretura. Ence ai todesc ti sa l ladin dla televijion massa talian. Al é ora che la jent ladina veide ite che ence les lites aministratives é dantaldut politica, chestion de podei, vera per podei ester se enstesc. Da apeina diesc agn encà él n moviment ladin, la "Lista Ladins", che se provova de arjonje l dert a ester mendranza, na mendranza enstessa, autonoma, per ghiré duc i derc che ti speta desche mendranza. Ala ne se trata nia de fé vera ai todesc, ma de damané a ei de nes lascé ester "nos enstesc", de podei colaboré a la per con ei. Azetan l proporz, ma te n raport lede y nia subordiné a la bona luna di autri. L medem vel per la reprejentanza politica: autonoma, direta y no scincheda. N gran laour interessant.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.356 seconc