La sonda "Spirit" é arsida sun l planet Mars

Sondes spaziales ciala de descuerje i misters de Mars - Sen chìrela do ega y ciala de afustié segns de vita sun l planet cuecen

(if) En domenia adora él arsì "san y enton" l robot "Mars Exploration Rover" dla NASA, clamé ence "Spirit", sun l planet cuecen, l planet plu vejin a nos tl sistem soredlar. Na arsida de suzes, do che la sonda europeica "Beagle" é juda a perde. Atira do l'arsida, da les 5:52, él vegnù capté i prums segns de vita de Spirit da la stazion de comane a tera dla Nasa. Per podei dé soura a "na maniera monejela" sun la cortesc marziana, é la sonda vegnuda protejuda da de grandiscims "airbags" soflés su con gas. Spo éla cogoleda per ben 800 metri denant che se archité dant l cratere "Gusev", belavisa desche an ova planifiché. L viade al planet Mars à duré passa mez ann. L proscim dovier de Spirit sarà chel de lubrì fora deplen i panei solars y empié si sensours y sies telecameres per chirì do ega y eventualmenter vita sun l planet Mars. La NASA à publiché sun sies plates internet les prumes imajes sensazionales y reportajes sun l stade dla miscion. Te trei edemes déssel arsì na seconda sonda sun l'autra pert de Mars.