benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Les competenzes di assessours / dles assessoures
scrit ai 23 December 2003 da les 13:47:44 da noeles

Politica

 

La nueva Jonta provinziala de Bulsan é en pe

Deguna mudazion ne él per Florian Mussner, al resta inant assessour per i laours publics y la scola y cultura ladina.

(osp) An aspetova bele ert de enrescì coche al vegnissa spartì su les competenzes tla Jonta provinziala nueva, sceben che bele valgugn dis dantfora fòvel trafonù dut cant. Pro la senteda de chesta edema él vegnù fat alsavei ofizialmenter l ejit dles tratatives. Dampertfora él sté la nomina de Otto Saurer desche prum Vizepresident Provinzial y de Luisa Gnecchi desche seconda Vizepresidenta, spo ésen passés a la spartizion di doviers.



L President Luis Durnwalder mantegn les competenzes che al ova enfin a sen, restan la persona de referiment per la direzion generala, les corporazions locales, studafuesc y aiut zivil, forestala, agricoltura sperimentala y laours sun i rufs da mont. L assessour Otto Saurer sourantol les competenzes per la scola todescia y la formazion profescionala todescia y ladina. Chest ciamp de laour ensera tamben l aconsiament profescional, i emparadours de n ert, l’Université ledia de Bulsan, l´Eurac, albercs per scolés y studenc, i contribuc per studes y l trasport di scolés per duc i trei grups de rejoneda.

L'assessoura Luisa Gnecchi se cruziarà per i proscims cinch agn dla scola y dla formazion profescionala taliana,  dl laour, la defenura dl laorant y la igiena tl laour, l ciamp dles cooperatives y la inovazion tl'industria y tl artejanat. Laprò ruva ciamò la coordinazion per i imigrés. I ofizes che à da nen fé con chest ciamp romagn pro les partizions che ai fova enchin a sen. Al assessour Hans Berger ti él vegnù sourandé i ciamps dl'informatica y dles telecomunicazions, dl liber fondiar y cataster, souraprò l setour dl'agricoltura y dl laour pauril, dla formazion paurila y forestala. L assessour Luigi Cigolla sourantol da Berger la partizion al patrimone provinzial y se salva i ciamps dla cultura y dl fabriché abitatif talian. L’assessoura Sabina Kasslatter Mur é la persona de referiment per la cultura todescia y la sconanza di monumenc, per les eles, familia y joegn. L assessour Werner Frick se cruzia inant dl'economia, con les repartizions Industria, Comerz, Artejanat y Servisc. Souraprò giàtel ence competenzes per les finanzes y l bilanz. L assessour nuef Thomas Widmann sourantol i setours dl trafich,  dl trasport, dl turism y dl personal.  L auter assessour nuef Richard Theiner é responsabel per la partizion dla santité y dl setour sozial. Michl Laimer resta assessour a l'urbanistica, ambient, eghes publiches y energia. Tl davegnì ne aràl nia plu la competenza sun l'informatica y les telecomunicazions.  Deguna mudazion ne entravégnel per Florian Mussner, al resta inant assessour ai laours publics, la scola y cultura ladina. 

Aldò de Durnwalder podéssel ciamò entravegnì na mudazion pro l personal. Sen se tràtela demé plu de sotescrive l decret per ofizialisé les competenzes tla jonta nueva.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.374 seconc