N organism nuef sourantol la promozion turistica te Fascia
Dutes les categories interessedes al turism tol pert - President é Riccardo Franceschetti
(c.g.) Do n ann de laour y de discuscions che se à porté do polemiches enfin enultima, él vegnù sotescrit ai 12 de dezember tla senta dl Comprenjore Ladin l at notaril per la fondazion dla sozieté cooperativa turistica (Scarl) da pert di 7 comuns, dles does assoziazions di ostiers/hoteliers (Asat y Unat), dla Union de Comerz y Turism, dai 2 consorzes di implanc portamont, dai 2 consorzes de comerz y da d'autres assoziazions per l temp lede. 1.000 euros é la cuota soziala paieda ite da chisc sozes per ti dé vita al organism nuef che condujará a la privatisazion.
An spera de avei tl davegnì na adejion sterscia da la majera pert di operadours dl turism de Fascia. Per entratant él vegnù nominé Riccardo Franceschetti desche president; al fova bele president dla vedla Azienda de promozion turistica, y Alessandro Boschetto desche vize-president. Les autres nominazions reverda l consei de aministrazion che cumpeida 20 persones y che raprejenteia duc i setours turistics. Tl comité esecutif é vegnù clamé, dlongia a Franceschetti y Boschetto, ence Enzo Iori per i ostiers/hoteliers dla Val de Soura, Manuel Farina per i ostiers/hoteliers de Moena, Mariangela Nocher per i setours extra- alberghiers, Diego Perathoner per i implanc portamont y Livio Crepaz per i consorzes de comerz.
L consei de aministrazion se à abiné per la pruma outa ai 17 de dezember per aprové l contrat de laour per l personal, les competenzes aldò dla lege provinziala de Trent n. 8/2002 y per mané ite la domanda y l reconesciment aldò dla medema lege provinziala.
