N coliament diret anter Aunejia y Cortina d'Ampez
Al é na scomenciadiva dles impreises de trasport publich "DOLOMITI BUS" y "ATVO"
(em) Chisc dis à l'impreisa “Dolomiti Bus S.p.A.” de Belun y la ’”Azienda Trasporc dl Venet Oriental S.p.A.” de San Donà del Piave prejenté tl hotel Hotel Ancora a Cortina na linia nueva de bus che coliarà da sen inant Cortina d'Ampez con Mestre y Aunejia. La coriera che peia via da Mestre ruvarà enfin a Cortina d'Ampez y spo furnaràla endò derevers. Al é n servisc volù souraldut da la Provinzia de Belun che se à dret dé da fé per la realisé.
La linia vegnirà metuda a jì da les does sozietés deberieda y les corieres jirà vigni dì. Duc i orars y les architedes vegnirà organisedes a na moda che chi che vegn con la ferata a Mestre giate na coriera de coliament per Longarone-Zoldo, Tai-Comelich, Bourcia, San Vido y Ampez. Les does sozietés à ence fat n pat con “Trenitalia S.p.A.”. Do la prejentazion él vegnù sport valch da beive y da mangé per duc chi fova vegnus enviés, y da cinch menuc dant les does él bele ruvé su la pruma coriera da Mestre, demé en chel dì se àla archité per la gaujion dant l hotel Ancora, propi sun la plaza de Cortina d'Ampez, y nia te Stazion, desche ala fajarà da sen inant. (Ls:if)
