An ti à plu y plu creta al software "Open Source"

L software lede davagna tres deplù aplicadours  - N valgugn comuns de Südtirol adora "open office".

(if) L parlamant dl "Australian Capital Territory (ACT, Canberra)" à aprové na lege che perten che l Govern tegne cont te sies planificazions de investimenc informatics ence dla poscibelté de adoré software open-source (na bona definizion de cie che an miena con "open source" giàten a la miscion: http://solution2u.net/opensource/about/definition).  En curt "open source" vuel dì che al se trata de software nia lié a copyright. Al pò vegnì mudé ju liberamenter. En pratica còstel truep demanco, sce nia debant y gonot pòl scemplamenter vegní des-ciarié ju da internet. I sostegnidours/svilupadours vuel con chest garantì n azes lede a l'informazion y a internet y se dejarenté dal monopol Microsoft che se ghira strambaries per les lizenzes.

L prinzip che sta viadedò é chel de lascé permez duc ai mesi informatics, zenza lizenzes. Roslyn Dundas, un di proponadours dla lege tla Australia, à fat l cont che l Govern à spenù ti ultims sies meisc  demé 15 milions de dolars per lizenzes y prestazions da pert dla Microsoft. La dezijion per "software lede" ne é perchel nia steda ria: "La poscibelté de adoré software "open source" é concreta. Chesta lege é n messaje emportant per i autri stac y les autres aministrazions dla Australia", miena Dundas. Leges somiantes é sun troi de vegnì aprovedes ence autró. La lege arà ence conseguenzes positives ence sun la industria informatica locala.

Ence te Südtirol é l tema dl "open source" entratant na chestion che sfiora su can chilò y dailò. Depierpul che l'aministrazion provinziala se fej naouta empermò prums pensiers per cie che reverda sia  aplicazion, é l Consorz di Comuns de Südtirol ju n vare plu inant. Truepes aministrazions comunales adora "Open Office" empede i programs ciaradousc dla Microsoft ("Word"). Al é propi sté l costiment dles lizenzes dla Microsoft, araté massa aut, l argoment plu sterch per fé l vare te n ambient informatich nuef. Pro l "Open Source" aud ence l sistem operatif LINUX.

A livel nazional talian ( http://www.parlamento.it/leg/14/Bgt/Schede/Ddliter/16976.htm) ésen tamben tl laoré fora normes per l pluralism informatich, l'adoranza y l desladament dl software lede tla aministrazion publica