Concurs per ensegnanc dles scoles elementares ladines
Concurs per stieres da ensegnanc/tes de classa y per ensegnanc/tes de religion dles scoles elementares ladines. Termin: enchin ai 23 de jené 2004
(osp) L test complet per chest concurs é vegnù publiché enier, en mertesc ai 9 de dezember 2003, tl Boletin ofizial dla Region. Duc chi che à na stiera a temp determiné y à per chesta n titul de stude, pò fé domanda per l concurs per na stiera a temp indeterminé. I titui de stude ghirés y les condizions damanedes é splighedes tl detai tla escrizion dl concurs enstes. I formulars per i doi concursc é da giaté pro la Intendenza a la Scola Ladina.
Les domandes pò vegnì dedes ju enfin a en vender, ai 23 de jené 2004 da les 17.00 pro la Intendenza ala Scola Ladina, tla streda Binder 29 a Bulsan. Sce an da ju la domanda de persona végnel tout en consciderazion l stempl dla Intendenza. La domanda pò vegnì ortieda ite zenza marca da bol y la sotscrizion ne mess nia vegnì autentificheda. Per i documenc che é bele vegnus dés ju tla Intendenza él demé da fé na picera anotazion. Chi che ademplesc les condizions per tò pert al concurs pò en plu tò pert a n curs de enjignament de 150 ores con majer peis sun argomenc de metodologia y didatica. L luech y l termin di cursc vegn ciamò lascé alsavei. Per tò pert al curs, o ence demé a pertes de chest él ence da fé domanda enfin ai 23 de jené 2004. L test entier dl concurs giàten tla rei zivica a la miscion: www.provinz.bz.it/intendenza-ladina. Per informazions tl detai pòn se ouje a Carla Pedevilla (0471-417 015), per i cursc de preparazion con Lois Ellecosta (0474-506 011).
