benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

MANIFEST LADINIA 2005 va inant
scrit ai 07 December 2003 da les 12:17:31 da noeles

Ladin Standard

 

La scienza linguistica dij de scì, la politica pesima

La chestion dl lingaz é na cossa che ti envel a vignun - La azion de sotescrizion va inant enfin al 2005

L'elaborazion de n lingaz scrit ladin unitar se à giaté bendebot de arfereda do la delibera di 27 de jené 2003 dl assessour provinzial Florian Mussner. Al à praticamenter sclut fora chesta forma scrita da l'ofizialité tla provinzia de Bulsan. Na delibera che ne jiva daldut nia debujegn y che é demé vegnuda ideeda per chesta funzion, condutes les autres spligazions y vertoles entournvia. Con chesta situazion giuridica che respiedla ence la impostazion politica él dassen vegnù metù comprometù l avanzament saren dl projet de n lingaz scrit unitar che veid dutes les unversités, les istanzes linguistiches y culturales che meina do y la politica depierpul che arfera, Istitut Ladin Micurà de Rü (MdR) anterite, ma che a la fin mess "olghé" a la politica, desche sie arat a la delibera souradita à desmostré (dut l Consei a una!). Al é cler che l impuls, la vijion te chesta chestion mess dantaldut ence vegnì dal aut, al mess vegnì popularisé anter la jent da la politica, da les istituzions de dovei. Al scomenciament fòvel propi l Istitut Ladin Micurà de Rü con a cef enlaouta l diretour Dr. Lois Craffonara, na persona con vijions y gran savei tl ciamp linguistich, che ova aplané l troi dantfora y ova metù a brodolé, per la pruma outa, la pera lingaz scrit unitar, Ladin Dolomitan o Ladin Standard (LS) desche al vegn nominé aldidancuei. L obietif che an vuel arjonje empera é scempliscim: avei n pont de referiment linguistich unitar ence per i idioms, sauridé empera la comunicazion interladina, se mostré linguisticamenter deforavia unis y enfortì les poscibeltés de souravivenza.  



Lois Craffonara ova tout su contat con l professour universitar Dr. Heinrich Schmid da Zürich/Turic, ideadour dl Rumantsch Grischun, ova metù man da tiesce i contac y l cheder grove dl projet. An ova lié ite l Istitut Ladin te Fascia y deberieda òven dl 1988 enciarié l professour universitar Schmid de elaboré la "Wegleitung". Ence l diretour dl Istitut Ladin de Fascia Fabio Chiocchetti à atira vedù la gran ocajion per fé n gran saut de cualité inant desche les publicazions dl Istitut l demostra y de auzé l projet a livel interladin con a la pert la Union Generela di Ladins dles Dolomites. Dl 1994 nàscel spo l projet SPELL, tl prum, enfin al 1997 zenza Istitut Ladin MdR a la pert. L projet laora dutaorela, sceben a flama bassa. Les tratatives per la convenzion anter les istituzions ladines che tol pert al projet SPELL é endere dagnora stedes dret conflituales. Enscì se splìghen ence la delibera souradita che va completametner tla direzion contrara.  Fascia sostegn plenamenter l projet, ma sce l lingaz ne peia nia raijes ence tla Val Badia y te Gherdeina aràl pueces chances de fé l troi, scialdi de suzes dl Rumanc Grijon tla Svizra, olàche al à n status ofizial dlongia i idioms y é entratant reconesciù da duc. Sce chest ne suzed nia  vivaràl inant na esistenza al our. Per ti dé na sburla él sen vegnù scrit l Manifest Ladinia 2005, con degun colour politich, ma scemplamenter ispireda dal festide per l lingaz ladin, firmé dantfora da esperc linguistics de romanistica, professours universitars ladins y nia ladins y da n grum de d'autri sostegnidours. Ciuldì pa Manifest 2005, l manifest ciala dantaldut inant tl davegnì, ma recorda ence l'ann 1905 canche al é vegnù metù en pé a Dispruch la pruma assoziazion interladina dl Tirol, nomineda "Union Ladina". I statuc stampés dl 1912 demostra che les idees fova bele enlaouta scialdi cleres, anter l auter, crié na ortografia unica per dutes les variantes dles valedes y unificazion de duc i Ladins che viv tl vedl Tirol. Te chesta tradizion de revendicazions se senta ence ite chesta iniziativa. La regoiuda de firmes va inant sun l sit www.noeles.net  clichede ----->  Les undesc teses 

 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.342 seconc