Portes davertes tl Museum Ladin de Fascia
En sabeda ai 13 de dezember 2003, scomenciadiva metuda a jì dal Istitut Cultural Ladin "majon di fascegn" y dal Museum Ladin de Fascia
(be) Per ti dé l dret peis a la Radunanza Generala dl Istitut Cultural Ladin ”majon di fascegn”, che vegnirà tegnuda en sabeda ai 13 de dezember tl Museum Ladin, él vegnù metù a jì na giorneda ”Usc daverc” per ti lascé vijité a duc l Museum debant.
Dr. Fabio Chiocchetti, diretour dl Istitut
USC DAVERC TL ISTITUT, vedrina privilejeda per porté dant l laour fat dal Istitut Cultural te sies ativités desvalives: dai projec linguistics al coretour ortografich ladin per l computer, da les novités editoriales a les enrescides.
USC DAVERC TE MUSEUM per ti mostré ai amisc i laours fac tl ultim ann y les novités, desche per ejempl la teila ”Mosè salvato dalle acque” de Valentino Rovisi, sibe ti salfs dl Museum, sibe tla Sala Multimediala, deventeda con sies dotazions tecnologiches l cuer dl’ativité didatica di Servisc educatifs dl Museum.
USC DAVERC TE MUSEUM acioche chi che ne l à nia ciamò vijité posse en apriejé la conzezion, i ogec metus fora y i films multimediai che al vegn enconté tres l percurs.
USC DAVERC TE MUSEUM, donca, desche ocajion per se abiné adum, per fé n bilanz de cie che al é vegnù fat enchin a sen y per conesce dantfora i programs dl Istitut Cultural Ladin y dl Museum Ladin de Fascia per l davegnì. Ma chest n’é ciamò nia dut...
La giorneda met man da les 9.30 con la prejentazion de ”Aa-gar – l ciaciador solitar”, n liber ilustré per mutons nasciù da na colaborazion con la scola. Usc daverc empontassù donca envers scolés y ensegnanc, che pò te Istitut y te Museum giaté archifs, na biblioteca spezialiseda y, con l 2004, n strument multimedial nuef y deletoul: l sistem SCRIN (l scrin dla memoria), con chel che an podarà se arvejiné saurì al patrimone storich dla jent ladina tres archirides con l computer. Da les 4.00 domesdì saràl la Radunanza Generala dl Istitut Cultural Ladin tla Sala Multimediala ”L. Heilmann” dl Museum, olache al vegnirà prejenté l’ativité dejouta tl 2003 y i programs per l 2004, ti damanan ai partezipanc de porté dant sies osservazions y sies propostes.
An podarà donca vijité debant l Museum dut l di, dadoman da les 9.00 a les 12.00 y domesdì da les 3.00 a les 7.00.
