benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Seira d'informazion soura l LS
scrit ai 02 December 2003 da les 01:23:17 da noeles

Ladin Standard

 

Tla provinzia da Bulsan él n boicot

Erwin Valentini: "Les istituzions messessa avei deplù trasparenza y prejenté si programs publicamenter" - Rut Bernardi: "Important él sen scrive truep per Ladin Dolomitan/Standard, al volessa ester n Harry Potter per Ladin Dolomitan" - Vittorio Dell'Acquila: "L LS é demé n'autra maniera de scrive ladin"

Sun envit dla Comunanza Ladina à Bulsan él vegnù tegnì enseira n'enconteda de informazion soura i laours fac dal projet SPELL te chisc ultims agn y les prospetives per l davegnì. I laours pò se lascé vedei. Dl 2001 fòvel vegnù prejenté la gramatica, dl 2002 l dizionar y sen dl 2003 él vegnù metù sun meisa valgunes d'autres "scincundes": l indesc talian-LS y todesch-LS, l coretour ortografich y l Dizionar dl Ladin Standard on-line. Sen ésen tl laour de laoré inant pro l vocabular y sun ciamps spezifics, vedus dantfora é desvalifs glossars setoriai: botanica, medejina, architetura y e.i. L strumentar per scrive ladin é naouta dantman. "L lingaz scrit unitar é dantman, ma les valedes ladines é spedicedes, nia demé con confins politics, ma dantaldut da confins psicologics cherscius ti cerviei", à dit Erwin Valentini l atual president en ciaria dl projet SPELL. En vender che vegn vegniràl tegnì l'enconteda con l Istitut Ladin Micurà de Rü per vedei, sce al é ciamò valch che an pò fé deberieda. La meisa di reladours tl Josefsaal dla Ciasa Kolping a Bulsan, da manciancia: Erwin Valentini, Rasom Sabrina, Nadia Chiocchetti y Vittorio Dell'Acquila.



Al vuel ester de tré ite les istituzions, la politica, ma tla provinzia de Bulsan él sté de chest vers n boicotaje, nia demé con l decret "Mussner" dè pro con arat dl Istitut Ladin Micurà de Rü, ma al é la volenté politica y istituzionala de ascone via l resultat dl projet SPELL. Co vala pa inant? Duc, ence l Istitut Ladin Micurà de Rü, dij de volei jì inant, l problem é endere co? Depierpul che da pert de Fascia ne él degugn problems, al contrar, an à les persones y al vegn laorè truep sun chest ciamp, ne él suzedù net nia tl Istitut Ladin Micurà de Rü da en l ann passé encà, sceben che al ova, deberieda con les autres istituzions y unions assoziedes al SPELL, sotescrit bele dant da  4 agn n program con criters scialdi clers: 1. al lingaz ladin scrit unitar ti végnel reconesciù na importanza fondamentala, 2. l obietif dess vegnì arjont con na colaorazion interladina, 3. l LS é na garanzia de svilup dl lingaz ladin. Per l Istitut é chestes restedes de beles paroles y nia valch d'auter. Piec con la delibera "Mussner" ti él entratant ence vegnù sclut l troi dl'ofizialisazion. L Consei dl Istitut MdR vuel sen - do les ultimes indiscrezions - mete sun meisa n valgunes propostes de mudazion: -u- empede -o- tla atonia p.ej. pruzes, pruposta vs. prozessé, propone,  formes che porta plu complicazions  che clareza y trasparenza che an enconta tla gramatica y tl dizionar dl LS publichés.  Peratuer él - adenfora de Gherdeina (ma nience ilò conseguentamenter desche an pò vedei dal vocabular gherdeina M.Forni) - dlonch normé -o-. Tatica per boicoté, puecia competenza linguistica o deguna vueia de reconesce na colaborazion interladina, bonamenter dut adum.

Vittorio Dell'Acquila é ju ite sun valgugn aspec tecnics dl ladin standard, sotlinian che l LS ne é nia n lingaz nuef, ma scemplamenter na forma autramenter de scrive ladin y nia deplù. La romanista Nadia Chiocchetti é juda ite sun i aspec linguistics (reportés te n articul a pert, ciala proscim articul). Dedò à la scritoura Rut Bernardi prejenté en curt sie liber "Letres te n fol" (per Ladin Dolomitan/LS y todesch dlongia) y dantaldut sies esperienzes con scrive LS y con les istituzions. Degunes ne ova truep interes de sostegnì l scrive. Ala dij che l LS messessa vegnì scrit l plu che al é meso. Dret d'utl fossa, ciuldì pa nia, na traduzion de Harry Potter tl Ladin Dolomitan. L prestisc dl ladin mess vegnì auzé. Per Rut Bernardi ne él nia massa adora da scrive per LS, ma al deventa massa tert, y an dess se spazé y scrive, scrive plu che al é meso. N de gré ti àla sport a Carlo Willeit che à dagnora abù na oredla daverta de chest vers. L LS, enscì àla fat l'esperienza, se lascia saurì destré tla letura al idiom de valeda desche ela à fat l'esperienza pro la RAI.  Sabrina Rasom à fat na desmostrazion coche l coretour ortografich funzioneia y Claudio Giuliani desche al funzioneia l dizionar on-line dl LS che i podeis arjonje ence con l liam da chest sit enfora (ciala menù a mandreta).

La seira é steda plena de informazions y messessa perdret ence vegnì metuda a jì tles valedes, fosc sun scomenciadiva dles Unions di Ladins, coportadoures dl projet SPELL tl inom dla Union Generela di Ladins dles Dolomites che à inant n rodul primar te chest ciamp.


 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.372 seconc