Les tutes de posiziun dl vize-SVP Pepi Dejaco in l'ultima edema à fat lovè sö bindebò de reaziuns indignades, nia ma da pert di esponënc dla Lista LADINS. Dan da n'edema à tut posiziun le presidënt Dr. Giovanni Mischì, valutan la posiziun de Dejaco "de en livel bas".  Le vize-presidënt dl Consëi  y rapresentant ladin tl consëi dr. Willeit Carlo valutëia cinamai la poscibilité de na plöra por defamaziun, deache la tuta de posiziun é "plëna de falsitês" y ma finalisada a "descredité". Willeit ti tira ince les orëdles ai responsabli dla USC di Ladins che à lascè passé tres na te' lëtra, aladô de ël na desmostraziun dla "deblëza" di media ladins.

Ala basa dl disput sta la lege litala che la SVP à orü fà passè deboriada cun sü partners, danter chisc i Vërc, ala fin de otober 2002, mo che à incunté na oposiziun podora dapert di Ladins, mo ince de d'atri mëindri partis. La lista à manacè de jì dan dala Curt Costituzionala impara sciöche dl 1998, sce al foss gnü metü ite le "Ladinerpassus", orü dala SVP ladina, che ess comprometü dassënn la poscibilité de espresciun democratica dapert di ladins. Ala fin l'à la SVP dada sö.

Le curs de "colauraziun" che la lista LADINS y Willeit â instradè cun ne fà nia recurs cuntra la cherdada da foradecà de en assessur ladin dapert dla maioranza SVP ne s'à  daldöt nia paiè fora, no pro la lege litala, no pro la nomina dl assessur cherdè. La porsona che é gnüda inciariada sciöche assessur é stada deplëgn na dezijiun dla SVP, la lista LADINS ne à albü nët nia da dì y ne é nia gnüda consultada, scebëgn che ara rapresentëia na buna pert dl eletorat ladin y le su aconsiadù tl Consëi Provinzial. Chësta é stada na desmostraziun tlera che an chir vigni ocajiun da pestè sot y stlüje fora en partì autonom ladin, a dann dl dërt de lita di ladins.