Premiera de "Cianties y balades ladines", na seira garateda
"Cianties y balades ladines" te n conzert de aut livel - Dlongia Fonso Willeit à dret plajù les oujes joenes da sopran de Susi Rottonara y Erika Mussner
L conzert "Cianties y balades ladines" à trat adalerch trueps ladins enseira (20.11.03) tl Salf Mercantil a Bulsan. Gran aplaus per l ciantadour Fonso Willeit (bariton) y les ciantarines Susi Rottonara da La Ila y Erika Mussner de Selva (trames sopran) y Ulrich Willeit y Max Ploner al clavier. Introduzion y spligazion a les singules cianties à ofrì Lois Ellecosta, enstes un di poec dles rimes metudes en mujiga da Fonso Willeit. La scomenciadiva per l conzert é pieda via da la Consulta Ladina dl Comun da Bulsan y se à ghiré trueps laours de preparazion.
Sun l retrat da manciancia: Ulrich Willeit, Max Ploner, Erika Mussner, Susi Rottonara, Fonso Willeit y Olga Moling, viadedò Lois Ellecosta.
Fonso Willeit, vedl mede di mutons, da La Pli, ma da giut aciasé a Maran é - sciche duta la familia Willeit de Soratrù dret musicala y ativa per la cultura ladina y al ne é nia sie prum vare de chest vers. Desche amatour dla mujiga se àl tout la bria de scrive les melodies nueves per cotantes composizions poetiches de conescius autours ladins: Tita Alton, Angelo Trebo, Pio Baldissera, Lois Ellecosta. Per porté dant con variazion chestes melodies nueves se àl ence lascé daidé da does joenes, la joena virtuosa Susi Rottonara, ciavei fosc lonc y eleganta (fia dl artist Lois Rottonara, inom d'ert Rott), la gran sorpreisa dla seira per sia performance y da Erika Mussner de Selva. Trames se dà ju profescionalmenter con l cianté y la mujiga, cie che ne é nia sté da souraudì. N aplaus lonch y sterch à sotlinié l reconesciment de sia bravura. Al clavier l fre de Fonso Willeit, Ulrich Willeit y pro Erika Mussner Max Ploner. L conzert se meritassa de vegnì porté te deplù luesc.
L program à vedù dantfora chestes composizions nueves de Fonso Willeit.
Cianties da vigni dì:
A les beles vals ladines (Pio Baldissera),
Orazion da seira (Pio Baldissera),
Ciantia de cuna (Fonso Willeit),
Orazion da doman (Fonso Willeit),
La oma (Angel da Punt),
Ai Ladins (Tita Alton),
A Reveder (Tita Alton),
Dolasila (Fonso Willeit),
A la oma (Fonso Willeit),
L cest vuet (Fonso Willeit),
Ie vue te costodì, mie mut (Ronald Kurz)
Susi Rottonara – Sopran,
Ulrich Willeit – Clavier:
Cianties d’amour:
Passé (Lois Ellecosta),
Massa tert (Lois Ellecosta),
Ben danter mile steiles (Lois Ellecosta),
Seira d’invern (Iaco Ploner)
Cor de mutons con chitara
Cianté fej ben: cianté y depenje (dessegns de Eberhart Frank)
Dr. med. Alfons Willeit:
Musiga y medejina - statement
Paussa con pice renfresch
Erika Mussner –Sopran
Tralascé - zicle de cianties de Angelo Trebo:
Tralascé,
L lé de mont,
L bal,
A la nuet,
Perié
Fonso Willeit – Bariton,
Max Ploner – Clavier:
L bracon (Tita Alton)
Duet, Fonso Willeit y Olga Moling: Sopran + bariton / clavier:
La roda (Matio Declara)
