benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Mont de Souc - Implanc portamont y scola a Picolin
scrit ai 18 November 2003 da les 12:32:36 da noeles

Aministrazion

 

La streda sun Mont de Souc vegn scluta

Deguna scola profescionala a Picolin, massa puec scolés

La regolamentazion per la streda sun Mont de Souc che jirà en doura ai 20 de dezember 2003 y l plan di implanc portamont é stés i argomenc plu emportanc che é vegnus tratés tl’ultima senteda dla Jonta Provinziala da enier. A Picolin ne jiràn nia plu inant con la Scola Profescionala. Do plu tratatives él sen segur, la streda sun Mont de Souc vegn scluta entratant l dì y chest dai 20 de dezember 2003 inant. La dezijion dla Jonta Provinziala vel per n iade provisoriamenter per un n ann y spo podéssel vegnì fat adatamenc. A l’auteza de St. Valentin vegniràl metù na stangia che sera la streda d’invern da les 9.30 a les 15.00 y d’isté da les 9.30 a les 16.00.



Da doman, dant l orar de scluta vedù dantfora, pòn furné sun Mont de Souc   enfin che les  700 lueges dai auti sun Spitzbühl,  Ciampac y Bulacia ne é nia plenes y tant giut che l semafer lumina a vert. Entratant l orar de scluta dla streda   pò  demé transié chi che à na lizenza ajache ai viv, laora o che ai é de cuartier sun Mont de Souc, él vegnù splighé dal President Durnwalder. Entratant l orar pò furné su  ence enfin a cater corieres. Dl servisc dles corieres se cruzia l comun de Ciastel che ne giatarà degugn contribuc   da la Provinzia per chest servisc. Chi che é bele sun Mont de Souc con l auto pò dé outa da vigni ora. La coriera dal Ciampac che meina ite dal Ric y Sautaria transiarà inant y enscì pòn arjonje saurì les ostaries te chisc raions. Tl raion dl Scilier vegniràl metù a ji n shuttle-service che meina debant enchin pro la furnadoia nueva, chest bus vegn sostegnì da la Provinzia. Per evité che al sie giut da aspeté da vegnì da mont ju con la furnadoia, pòl vegnì lascé  lascé jì la furnadoia plu debota y enjonté de plu cabines, auzan enscì la capazité de trasport da 2.400 a 4.000 persones a l’ora, à dit l President dla Jonta. Dant da tò na dezijion à la Jonta ciamò cialé tres les protestes manedes ite dal comun de Ciastel. La furnadoia nueva da Souc enchin  sun Mont de Souc, che é vegnuda finanzieda con cinch milions de Euro da la Provinzia, fova vegnuda daurida ai 15 de aost 2003. I scioldi é vegnus destinés sciche n contribut per l ambient, él vegnù recordé da Durnwalder. La furnadoia dess perchel smendrì l transiament a motor sun Mont de Souc y desmostré che an à fat n bon investiment.

Deguna mudazion al plan di implanc portamont

Dant da trei agn ova la Jonta Provinziala dé pro al plan di implanc portamont per i proscims 10 agn. Do i pums trei agn pòl vegnì fat i prums adatamenc che é sen vegnus dés  pro da la Jonta Provinziala. I comuns ova de fauré dé ju les domandes per slongé o deslargé valch implant portamont, o olà che al é debujegn de fé ciamò valch auter coliament, n projet de chest vers. L President Durnwalder à dit che de piceres mudazions tecniches pro i implanc portamont che reverda la segureza o l aument dla capazité de trasport giata defata  l bensté. Te chest contest fòvel vegnù ortié ite 38 domandes. De maiours projec desche implanc portamont nuefs mess vegnì cialés do plu avisa. Devers la fin dl ann o tles prumes edemes de jené dess ence chisc plans vegnì tratés da la Jonta Provinziala.

Deguna scola profescionala plu a Picolin

La scola profescionala per turism y gastronomia de Bornech con les sentes destachedes a Picolin, Turesc/Sand in Taufers y Valsperch/Welsberg arà aldò dla delibera dla Jonta Provinziala, per n auter ann demé plu la senta prinzipiala a Bornech. Tles sentes destachedes a Picolin y Turesc/Sand in Taufers ne él nia scolés assé. Per la Scola Profescionala de Bornech végnel tout locai adenfit per i proscims cinch agn. Spo dess la scola vegnì trapineda a Dietenheim. (osp)


 
Liams emparentés
· Deplú sun l tema Aministrazion
· Chier te noeles


L articul plu liet te chest tema Aministrazion:
Dal Ofize chestions linguistiches: does verscions ladines dl Statut de autonomia


Valutazion dl articul
Cumpeida mesana de oujes: 2
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.368 seconc